ERMENI HABER AJANSI

Թուրքիայում առաջիկայում ևս մեկ անգամ ժամանակավորապես կկիրառվի վճարի դիմաց զինվորական ծառայությունից ազատվելու կարգը: Այն կտարածվի 26 տարին լրացած Թուրքիայի զինապարտ քաղաքացիների վրա: Զինծառայությունից ազատվելու համար վճարվելիք միանվագ գումարը կկազմի 20.000 թուրքական լիրա (4.320 ԱՄՆ դոլար):

Նշվում է, որ այդ համակարգը ևս մեկ անգամ կիրառելու հետ կապված աշխատանքները սկսվել և հիմնական գծերով ավարտին էին հասցվել դեռևս նախորդ կառավարության օրոք, սակայն այս մասին կհայտարարի նոր կազմավորվելիք կառավարությունը:

Ծառայությունից ազատվելու դիմաց վճարվելիք գումարները չեն մուտքագրվելու պետական բյուջե, դրանք ծախսվելու են պաշտպանական խնդիրների լուծման ուղղությամբ:

Թուրքիայում վերոնշյալ կարգը կիրառվում է 5-րդ անգամ: 1987 թվականին գումարի դիմաց պարտադիր զինծառայությունից ազատվելու օրենքի ժամանակավոր կիրառման արդյունքում բանակից ազատվել է 18.433 քաղաքացի, 1992-ին՝ 35.111, 1999-ին՝ 72.290: Վերջին անգամ օրենքը այս կարգը ժամանակավորապես կիրառելու մասին օրենք ընդունվել էր 2014 թվականին: Այդ ժամանակ 27 տարին լրացած Թուրքիայի 203.000 զինապարտ քաղաքացի, վճարելով 18.000 թուրքական լիրա, ազատվել էր պարտադիր զինվորական ծառայությունից:    

Հիշեցնենք, որ ավելի վաղ Թուրքիայի նախագահի Ռեջեփ Թայիփ Էրդողանը հայտարարել էր, որ այս խնդրի հետ կապված քայլեր կձեռնարկվեն հունիսի 24-ին երկրում տեղի ունեցած ընտրություններից հետո:

«Թուրքիայի զինված ուժերն արդեն զգալիորեն անցել են պրոֆեսիոնալ ծառայության: Այդ անցումը դեռ շարունակվում է: Այժմ էլ վճարովի համակարգի կիրառման պահանջարկ կա: Ընտրություններից հետո այս թեման կքննարկենք զինված ուժերի ղեկավարության հետ: Պահանջները, տարիքային սահմանափակումներն ու այլ պայմանները քննարկելուց հետո քայլ կանենք այս ուղղությամբ: Դա մեր օրակարգում է»,- ասել էր Թուրքիայի նախագահը: