ERMENI HABER AJANSI

Աշխարհի բոլոր երկրների ընդհանուր արտաքին պարտքը տարեցտարի աճում է։ Ընդ որում՝ զարգացած տնտեսություն ունեցող երկրներն այդ առումով առաջատար դիրք են գրավում։ Պատճառներից մեկն այն է, որ զարգացած տնտեսություն ունեցող երկրների համար ավելի հեշտ է միջազգային հարթակներում վարկեր ստանալ։

Երկրների վարկունակությունը որոշվում է ընդհանուր արտքաին պարտքի և երկրի համախառն ներքին արդյունքի հարաբերակցությամբ։ Տոկոսներով արտահայտված այդ ցուցանիշը որքան փոքր է, այնքան տվյալ երկիրն ավելի հուսալի է համարվում վարկ տրամադրելու տեսակետից։

Թուրքիան թեև ընդգրկված է այն երկրների ցանկում, որոնց արտաքին պարտքը համեմատաբար փոքր է, բայց վերջին երկու տարում այդ պարտքը նկատելիորեն աճել է։ Ամենաշատ արտաքին պարտք ունեցող երկրների ցանկում Թուրքիան գրավել է 26-րդ հորիզոնականը։

2015թ․ դրությամբ Թուրքիայի արտաքին պարտքը կազմում էր շուրջ 405 մլրդ դոլար։ Իսկ 2017թ․ դեկտեմբերի 31-ի դրությամբ այդ արտաքին պարտքը հասել է 453 մլրդ դոլարի։ Դա կազմում է երկրի համախառն ներքին արդյունքի 55 տոկոսը։ Այսպիսով, շուրջ 80 մլն բնակչություն ունեցող Թուրքիայում մեկ շնչին բաժին ընկնող պետական պարտքը կազմում է 5․500 ամերիկյան դոլար։

Պետք է նշել, որ այդ աճի մեջ կարևոր դեր ունի նաև թուրքական լիրայի կտրուկ արժեզրկումը․ նախորդ շաբաթ 1 դոլարը համարժեք էր 4․65 թուրքական լիրայի, մինչդեռ 2015թ․ դոլարի ամենաբարձր փոխարժեքը եղել է 3 լիրան։

Հայաստանն այդ ցանկում գրավում է 105-րդ հորիզոնականը։ 2017թ․ հունիսի 30-ի դրությամբ ՀՀ արտաքին պարտքը կազմել է 10 մլրդ դոլար, ինչը հավասար է երկրի համախառն ներքին արդյունքի 94 տոկոսին։

Աշխարհի ամենախոշոր տնտեսությունն ունեցող ԱՄՆ-ի արտաքին ընդհանուր պարտքը կազմում է 21 տրիլիոն դոլար, նրան հաջորդում են Անգլիան, Ֆրանսիան, Գերմանիան և Հոլանդիան։