ERMENI HABER AJANSI

Թուրքիայի վիճակագրական ընկերությունը (TÜİK) տվյալներ է հրապարակել մայիսի դրությամբ գնաճի (ինֆլյացիա) մակարդակի վերաբերյալ։ Ըստ այդմ՝ տարեկան գնաճի միջին ցուցանիշը կազմել է 12․5 տոկոս։

Ընթացիկ տարվա մայիսին Թուրքիայում սպառողական գների ինդեքսն աճել է 1,62 տոկոսով, ներքին արդյունաբերողների գնային ինդեքսը՝ 3․79 տոկոսով։

Սպառողական գների դեպքում տարեկան գնաճը կազմել է 12․15 տոկոս, ներքին արդյունաբերողների ապրանքների գների դեպքում՝ 20․16 տոկոս։

Ըստ «Reuters» պարբերականի՝ տնտեսագետները մայիսի համար Թուրքիայում կանխատեսել էին միջինը 1․45 տոկոս գնաճ։ Իրականում մայիսին ամենաբարձր գնաճը գրանցվել է հագուստի և կոշկեղենի շուկայում՝ 5․21 տոկոս, տրանսպորտի ոլորտում գրանցվել է 2․32, տարատեսակ ապրանքների և ծառայությունների ոլորտում՝ 2․06, հյուրանոցների և ռեստորանների, ինչպես նաև՝ սննդի և ոչ ալկոհոլային խմիչքների ոլորտում՝ 1․45 տոկոս գնաճ։

Տարվա կտրվածքով սպառողական գների ինդեքսի ամենամեծ աճը գրանցվել է տրանսպորտի ոլորտում՝ 20․02 տոկոս։ Տնտեսական ապրանքների գներն աճել են 16․87 տոկոսով, տարատեսակ ապրանքների և ծառայությունների գները՝ 15․38 տոկոսով, հյուրանոցների և ռեստորանների գները՝ 12․51 տոկոսով, բնակարանների գները՝ 11․24 տոկոսով։