Էրդողանը հայտարարել է Աֆրինում 41 թուրք զինվորի և 159 ՍԱԲ-ի անդամի զոհվելու մասին

Տարածաշրջան11:43, 06 Մարտ 2018

Էրդողանը հայտարարել է Աֆրինում 41 թուրք զինվորի և 159 ՍԱԲ-ի անդամի զոհվելու մասին

Թուրքիայի նախագահ, իշխող «Արդարություն և զարգացում կուսակցության» (AKP-ԱԶԿ) նախագահ Ռեջեփ Թայիփ Էրդողանը կուսակցականների հետ հանդիպման ժամանակ տվյալներ է ներկայացրել Աֆրինում կողմերի ունեցած կենդանի ուժի կորուստների մասին:

«Այս պահին 700քկմ տարածք մաքրվել է ահաբեկիչներից և գտնվում է մեր վերահսկողության տակ: Սպանված ահաբեկիչների (քուրդ զինյալներին նկատի ունի-խմբ.) թիվը հասել է 2872-ի: Թուրքիայի զինված ուժերի և ժանդարմերիայի մեր եղբայրներից զոհվել է 41, իսկ ՍԱԲ-ի («Սիրիայի ազատ բանակ» ընդդիմադիր զինված խմբավորումներ-խմբ.) մեր եղբայրներից՝ 159 հոգի: Աստված թող հանգստություն տա մեր բոլոր զոհերի հոգիներին»,- ասել է Էրդողանը:

Թուրքիայի նախագահի տեղեկացմամբ՝ Աֆրին ներխուժած թուրքական ստորաբաժանումներն ու ՍԱԲ-ի զինյալները թուրքական օդուժի աջակցությամբ ակտիվորեն գրոհում են Աֆրինի Ջինդերես շրջանը, որտեղ մեծ թվով քուրդ զինյալներ են տեղակայված:

«Շուտով այդ շրջանն էլ կմաքրվի ահաբեկիչներից և այդպիսով Աֆրինի կենտրոն հասնելու ամենամեծ արգելքներից մեկը հաղթահարված կլինի: Դրանից հետո հերթը կհասնի Աֆրինի շրջափակմանն ու այնտեղ կենտրոնացած ահաբեկիչների գլուխները ճզմելուն»,- ասել է Էրդողանը:

Հիշեցնենք, որ պաշտոնական Անկարայի աջակցությունը վայելող «Սիրիայի ազատ բանակ» խմբավորումը Թուրքիայի օդուժի, ապա ցամաքային ստորաբաժանումների աջակցությամբ հունվարի 20-ին ներխուժել էր Սիրիայի քրդերի վերահսկողության տակ գտնվող Աֆրին շրջան։ «Ձիթենու ճյուղ» անվանումով ռազմական գործողության վերջնական նպատակն է Սիրիայի քրդերից վերցնել Թուրքիայի հետ սահմանին ընկած 30կմ խորությամբ հատվածը և այնտեղ հիմնել անվտանգության գոտի։

Աղբյուր` T24.com.tr