ERMENI HABER AJANSI

Սիրիայում սկսված «Ձիթենու ճյուղ» ռազմական գործողության 3-րդ օրը Թուրքիայի աջակցությունը վայելող «Սիրիայի ազատ բանակը» Աֆրինից շարժվել է Մանբիչ շրջան և այնտեղ սկսել ռազմական գործողություններ քրդերի դեմ:

Միջանկյալ նշենք, որ Մանբիչը  նույնպես գտնվում է Սիրիայի քրդական ուժերի վերահսկողության տակ:

Ըստ  թուրքական «Milliyet» թերթի կայքի՝ այդ մասին տեղեկությունը հայտնել է «Սիրիայի ժամանակավոր կառավարություն»-ը (Ընդդիմադիր ուժեր):  Առայժմ, սակայն, մանրամասներ չկան այդ բախումների մասին: 

Հաթայ շրջանի ուղղությամբ քրդերի հարձակումից հետո  թուրք զինվորներն էլ ավելի  ուժեղ բախումների մեջ են մտել Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդական ինքնապաշտպանական ջոկատներ-ի (ԺԻՋ-YPG) հետ:

Թուրքական աղբյուրը նաև նշում է, որ Սիրիայում ընթացող զարգացումներին ուշի ուշով հետևում են միջազգային լրատվականները: 

Բրիտանական «Independent»  թերթի հայտնի թղթակից Փաթրիք Քոքբորնը նշել է, որ Անկարայի այդ կոշտ գործողությունը պայմանավորված է ԱՄՆ-ի պետքարտուղարության հայտարարությունով: Այնտեղ մասնավորապես նշվել էր, որ ԱՄՆ-ն պատրաստվում է Սիրիայի քրդական ուժերից 30 հազարանոց նոր զորախումբ ստեղծել: Չնայած ԱՄՆ-ի պետքարտուղարը հայտարարեց, որ հարցը սխալ է ներկայացվել, այնուամենայնիվ Աֆրինի գործողությունը ցույց տվեց, որ Թուրքիայի «համբերության բաժակը» լցվել է:

«Reuters» և «Associated Press»լրատվականներն էլ ինտենսիվորեն և օպերատիվ կերպով լուսաբանել են Թուրքիայի գործողությունները Աֆրինում:

Տեղեկություն է նաև հայտվել այն մասին, որ  Թուրքիայի Դիարբեքիրի հանրապետական գլխավոր դատախազությունը 17 քաղաքացու  բերման ենթարկելու որոշում է կայացրել, քանի որ նրանք սոցցանցերում  քրդական ուժերի օգտին գրառումներ են կատարել «Ձիթենու ճյուղ» օպերացիայի շրջանակներում: