Չավուշօղլուն խստորեն դատապարտել է ԱՄՆ-ի և Սիրիայի քրդերի համագործակցությունը

Տարածաշրջան06:12, 16 Հունվար 2018

Չավուշօղլուն խստորեն դատապարտել է ԱՄՆ-ի և Սիրիայի քրդերի համագործակցությունը

Թուրքիայի արտաքին գործերի նախարար Մևլութ Չավուշօղլուն մեկնաբանել է ԱՄՆ-ի որոշումը՝ Սիրիայի քրդական ուժերից նոր զորախումբ ստեղծելու մասին:

Ըստ թուրքական «Haberler» լրատվամիջոցի՝ Թուրքիայի արտաքին գործերի նախարարը նշել է, որ ԱՄՆ-ն իրավունք չունի դաշնակցային ուժերի անունից նման որոշում կայացնել: Ըստ նրա` այդ որոշմամբ տարածաշրջանում «քաոս կստեղծվի»:

«ԱՄՆ-ն պետք է հստակեցնի՝ ում կողմից է ինքը, դաշնակիցների՞, թե՞ ահաբեկիչների: Այս հարցի շուրջ պետքարտուղար Ռեքս Թիլլերսոնի հետ խոսենք պիտի: Չմոռանանք, որ Ռաքքայում նրանք իրենց խոստումը չպահեցին: Եթե Քուրդիստանի բանվորական կուսակցության (ՔԲԿ-PKK) դեմ պայքարում եք, ապա նույնը հարկ է անել Սիրիայի քրդական Ժողովրդական ինքնապաշտպանական ջոկատների (ԺԻՋ-YPG) պարագայում: Դրանց ետևում ով ուզում է թող լինի՝ ԱՄՆ-ն, կամ այլ երկիր, մեզ դա չի հետաքրքրում»,- նշել է Թուրքիայի արտգործնախարարը:

Հիշեցնենք, որ պաշտոնական Անկարան YPG-ին և PKK-ին նույնացնում է և համարում վերջիններիս ահաբեկչական կազմակերպություններ:

Աղբյուր` Ermenihaber.am