Անկարայի հակաքայլը Վաշինգտոնի դեմ

08:56, 12 Հունվար 2018

Անկարայի հակաքայլը Վաշինգտոնի դեմ

Այն բանից հետո, երբ ԱՄՆ-ի պետքարտուղարությունը իր քաղաքացիներին հորդորեց խուսափել Թուրքիա մեկնելուց, պաշտոնական Անկարան դիմել է պատասխան քայլի:

Ըստ թուրքական «Haberler» լրատվական կայքի՝ Թուրքիայի արտգործնախարարությունը Միացյալ Նահանգներ մեկնող իր երկրի քաղաքացիներին կոչ է արել պահպանել զգոնությունը: Իսկ եթե խիստ անհրաժեշտություն չկա, ապա ավելի լավ է որոշ ժամանակով հետաձգել այցը ԱՄՆ:

Թուրքական կողմը նշել է, որ վերջին ժամանակներս ԱՄՆ-ում աճել են ահաբեկչական գործողությունները, ձերբակալությունները, ինչպես նաև ռասիզմի դեպքերը:

Հայտարարության համաձայն՝ ԱՄՆ-ում թուրք մի շարք պետաշխատողների նկատմամբ իրականացվում են «ճնշումներ»: Ոմանք ձերբակալվում են «սադրանքների» հիման վրա:

Հիշեցվել է, որ վերջերս Նյու-Յորքի մետրոյում տեղի էր ունեցել պայթյուն,իսկ Տեխաս նահանգի եկեղեցիներից մեկում՝ զինված հարձակում: Բացի դրանից հիշատակվել է, որ Մինեսոտա նահանգի մզկիթներից մեկում նույնպես տեղի էր ունեցել զինված հարձակումը:

Աղբյուր` Ermenihaber.am