Քուրդ հրամանատար. «Եթե Թուրքիան հարձակվի, մենք մինչև վերջ կպայքարենք»

Տարածաշրջան12:27, 10 Հունվար 2018

Քուրդ հրամանատար. «Եթե Թուրքիան հարձակվի, մենք մինչև վերջ կպայքարենք»

Սիրիայի «Դեմոկրատական ուժեր» (SDG-ՍԴՈՒ) խմբավորման հրամանատարներից մեկը զգուշացրել է Թուրքիային, թե ինչ հետևանքներ կլինեն վերջինիս համար, եթե հարձակում իրականացնի Սիրիայի քրդերի վրա:

Միջանկյալ նշենք, որ SDG-ի մեջ է մտնում Թուրքիայի կողմից ահաբեկչական համարվող «Ժողովրդական ինքնապաշտպանական ջոկատներ»-ը (ԺԻՋ-YPG):

Թուրքական «Sozcu» թերթի կայքը, հղում անելով «Times»-ին,նշում է, որ SDG-ի փոխհրամանատար Աբդուլ Քադիր Էֆֆենդիլլին նշել է, որ իրենք մինչև վերջին պահը կռվելու են Սիրիայում այն ուժերի դեմ, որոնք կփորձեն իրենց նկատմամբ ոտնձգություն կատարել:

«Եթե Թուրքիան հարձակվի, մենք մինչև վերջ կպայքարենք: Թուրքերը, իրանցիները, և Սիրիայի կառավարական ուժերը միայն երջանիկ կլինեն, որ մեզնից մեր ունեցածը վերցնեն: Նոր պատերազմային իրավիճակ ստեղծելու մտադրություն չունենք, սակայն ամեն ինչին պետք է պատրաստ լինենք: Դաշնակցային ուժերի հետ միասին ազատագրած մեր քաղաքներին սպառնացող ցանկացած ուժին մեր բանակը կպատասխանի»,-ասել է Էֆֆենդիլլին:

Հիշեցնենք, որ Թուրքիան Սիրիայի քրդական ուժերին դիտարկում է որպես ահաբեկչական կազմակերպություններ: Թուրք պաշտոնյաները բազմիցս հայտնել են, որ երբեք թույլ չեն տա, որ Սիրիայի հյուսիսում քրդերը պետություն ստեղծեն: Մասնավորապես Թուրքիայի նախագահը մի քանի անգամ հայտարերլ է, որ եթե Սիրիայի քրդերը վտանգ ստեղծեն իրենց սահմանների համար, ապա իրենք կներխուժեն Աֆրին և Մանբիչ, որոնք գտնվում են քրդերի վերահսկողության տակ:

Աղբյուր` Ermenihaber.am