Իսմաիլ Քահրամանը վերընտրվել է Թուրքիայի խորհրդարանի նախագահի պաշտոնում

Քաղաքական08:04, 21 Նոյեմբեր 2017

Իսմաիլ Քահրամանը վերընտրվել է Թուրքիայի խորհրդարանի նախագահի պաշտոնում

Նոյեմբերի 20-ին Թուրքիայի 26-րդ գումարման խորհրդարանի նախագահի ընտրություններում կրկին հաղթել է ԱԶԿ-ական Իսմաիլ Քահրամանը:

Ըստ թուրքական «Anadolu» պետական լրատվական գործակալության՝ ընտրությունը արդյունք է տվել միայն 3-րդ փուլում, քանի որ առաջին 2 փուլերի ժամանակ թեկնածուներից որևէ մեկին չի հաջողվել ստանալ պատգամավորների 2/3-ի ձայները: 3-րդ փուլում, որտեղ անհրաժեշտ է ձայների պարզ մեծամասնությունը (50%+1 ձայն), Քահրամանը ստացել է քվեարկությանը մասնակցած 509 պատգամավորներից 289-ի աջակցությունը՝ ընտրվելով մեջլիսի նախագահի պաշտոնում:

77-ամյա Քահրամանի առաջադրումը դժգոհություններ էր առաջացրել նույնիսկ սեփական կուսակցության շարքերում: ԱԶԿ-ի որոշ անդամներ իրենց ձայնը տվել են ԺՀԿ-ի թեկնածուին, որոշներն (16) էլ նախընտրել են իրենց քվեաթերթիկն անվավեր դարձնել:

Խորհրդարանի նախագահի ընտրություններին թեկնածուներ էին առաջադրել խորհրդարանական բոլոր 5 կուսակցությունները. գլխավոր ընդդիմադիր «Ժողովրդահանրապետական կուսակցությունը» (CHP-ԺՀԿ) առաջադրել էր Իզմիրից ընտրված պատգամավոր Զեքերիա Թեմիզելի թեկնածությունը, քրդամետ «Ժողովուրդների դեմոկրատական կուսակցությունը» (HDP-ԺԴԿ)՝ Հաքքարիի պատգամավոր, ներկայում կալանավորված Սելմա Ըրմաքի թեկնածությունը: «Ազգայնական շարժում կուսակցության» (MHP-ԱՇԿ) թեկնածուն կուսակցության փոխնախագահ, Ստամբուլի պատգամավոր Ջելալ Ադանն էր: Նոր ձևավորված «Լավ կուսակցության» թեկնածուն (İP-ԼԿ) Կայսերիից ընտրված պատգամավոր, Թուրքիայի Պատմական ընկերության նախկին նախագահ, տխրահռչակ պատմաբան Յուսուֆ Հալաչօղլուն էր:

Իշխանական «Արդարություն և զարգացում կուսակցությունը» (AKP-ԱԶԿ) միանգամից առաջարկել էր երկու թեկնածու՝ խորհրդարանի ներկայիս նախագահ Իսմաիլ Քահրաման և Ադանայից ընտրված պատգամավոր Թեմար Դաղլը: 3-րդ փուլից առաջ Դաղլըն հանել էր իր թեկնածությունը՝ հօգուտ Քահրամանի:

Թուրքիայի խորհրդարանի նախագահի ընտրությունն անցկացվում է 4 փուլով:

1-ին փուլում փակ գաղտնի քվեարկությամբ ընտրվում է ձայների 2/3-ը ստացած թեկնածուն (367 քվե):

2-րդ փուլում կրկին ընտրությունը կատարվում է նույն սկզբունքով:

3-րդ փուլում խորհրդարանի նախագահ է ընտրվում ձայների պարզ մեծամասնությունը ստացած (50%+1) թեկնածուն:

4-րդ փուլում ընտրությունը կատարվում է 3-րդ փուլում ամենաշատ ձայները ստացած 2 թեկանածուների միջև:

Աղբյուր` Ermenihaber.am

Այս ենթաբաժնի վերջին նորությունները

13:10, 22 մայ

Թուրքիայից Սիրիա արտահանումն աճել է 36.7%-ով

Թուրքիայում կարծում են, որ Սիրիայի վերականգնումը կարևոր է տարածաշրջանում Թուրքիայի տնտեսական և դիվանագաիտական դերի համար։

16:23, 21 մայ

Էրդողան․ Հարավային Կովկասը թյուրքական աշխարհի համար ռազմավարական նշանակություն ունի

Թուրքիայի նախագահ Ռեջեփ Թայիփ Էրդողանը ելույթ է ունեցել Հունգարիայում անցկացվող «Թյուրքական պետությունների կազմակերպության» ոչ պաշտոնական գագաթնաժողովին: