Սոցհարցում. Թուրքիայի իշխող կուսակցության ընտազանգվածը նվազել է

Տարածաշրջան10:30, 06 Նոյեմբեր 2017

Սոցհարցում. Թուրքիայի իշխող կուսակցության ընտազանգվածը նվազել է

Թուրքիայում 2019 թվականին անցակցվելիք նախագահական և խորհրդրանական ընտրություններին ընդառաջ հետազոտական ընկերությունները սկսել են սոցհարցումներ անցկացնել՝ քաղաքացիների կարծիքի վերաբերյալ ընդհանուր պատկեր ստանալու համար:

Թուրքական «Սոնար» հետազոտական կենտրոնը նոյեմբերի 1-6-ը 26 նահանգում սոցհարցում է անցկացրել՝ պարզելու, թե ընտրելու իրավունք ունեցող Թուրքիայի քաղաքացիները ո՞ր կուսակցության օգտին կքվեարկեին, եթե առաջիկա օրերին խորհրդարանական ընտրություններ անցկացվեին:

Ինչպես տեղեկացնում է թուրքական «Diken» լրատվական կայքը, հարցմանը մասնակցել է 3000 բնակիչ: Հետազոտական կենտրոնը հարցման տվյալների հաշվարկները կատարել է 2 եղանակով: 1-ին դեպքում կուսակցությունների օգտին գրանցվել են նաև նրանց համակրող, սակայն վերջնական որոշում չկայացրած ընտրողների ձայները:

Ըստ այդմ ստացված պատկերը հետևյալն է.
Թուրքիայի իշխող «Արդարություն և զարգացում» կուսակցությունը (AKPºԱԶԿ) ստացել է հարցման մասնակիցների 38.51 տոկոսի ձայները, 23.50 տոկոսը նախընտրությունը տվել է գլխավոր ընդդիմադիր «Ժողովրդահանրապետական կուսակցությանը» (CHP-ԺՀԿ), ընդդիմադիր Մերալ Աքշեների հիմնած «Լավ կուսակցությունը» (İP-ԼԿ) ստացել է 16.06 տոկոսի ձայները, քրդամետ «Ժողովուրդների դեմոկրատական կուսակցությանը» (HDP-ԺԴԿ) աջակցում է 10.33 տոկոս, «Ազգայնական շարժում կուսակցության» (MHP-ԱՇԿ) օգտին կքվեարկի 7.78 տոկոսը, մյուս կուսակցությունները միասին հավաքել են 3.82 տոկոս:

2-րդ դեպքում չկողմոնորաշվածների ձայները առանձին են հաշվարկվել:

Պատկերը հետևյալն է.
ԱԶԿ՝ 34.3 %
ԺՀԿ՝20.9%
ԼԿ՝ 14.3 %
ԺԴԿ՝ 9.2 %
ԱՇԿ՝ 6.9 %
Այլ կուսակցություններ՝ 3.4 %
Չկողմնորոշվածներ՝ 10.9 %

Հարցման արդյունքների հաշվարկման երկու դեպքում էլ ազգայանական ԱՇԿ-ն չի հաղթահարել խորհրդարանական ընտրությունների նվազագույն 10 տոկոսի շեմը:

Նշենք, որ «Գորշ գայլեր» ահաբեկչական խմբավորման քաղաքական թևը համարվող կուսակցությունը 2015-ի հունիսին անցկացված խորհրդարանական ընտրություններում ստացել էր ընտրողների 16.29 տոկոսի քվեն, իսկ նույն թվականի նոյեմբերի արտահերթ ընրություններում հավաքել էր 11.9 տոկոս: