Թուրքիայում նախագծում են «Atak» ուղղաթիռի մեծ մոդելը

Տարածաշրջան08:04, 04 Հոկտեմբեր 2017

Թուրքիայում նախագծում են «Atak» ուղղաթիռի մեծ մոդելը

Թուրքիայի պաշտպանական արդյունաբերության ղեկավար Իսմաիլ Դեմիրը հայտարարել է, որ իրենք արդեն աշխատում են նոր սերնդի «ATAK» ուղղաթիռի նախագծի վրա:

Ըստ թուրքական «Milliyet» թերթի կայքի՝ Դեմիրը հայտնել է, որ նոր մշակվող մոդիֆիկացիան լինելու է ավելի ծանր և ավելի հագեցած մարտական ուղղաթիռ: Թուրք պաշտոնյան հայտարարել է, որ 10 տոննայանոց կարգում արտադրվելիք նոր ուղղաթիռը արտադրության կդրվի 2021 թվականին:

Թուրքական «Anadolu» պետական լրատվական գործակալության տեղեկացմամբ էլ պաշտպանական արդյունաբերությունը զուգահեռ նախագծում է նաև «ATAK» ուղղաթիռների մեկ այլ մոդիֆիկացիա, որը լինելու է 6 տոննա քաշային կարգում:

Հաղորդվում է, որ նոր «ATAk-2» կոչվող մոդիֆիկացիան արտադրվելու է ամբողջովին տեղական ռեսուրսներով:

«Atak» հարվածային ուղղաթիռն արտադրվել է Թուրքիայի ԶՈւ պատվերով՝ իտալական Agusta A129 Mangusta ուղղաթիռի հիմքի վրա՝ թուրքական և իտալական ռազմարդյունաբերական ընկերությունների մասնակցությամբ։ Թուրքական կողմից նախագծման աշխատանքներին մասնակցել է TAI (Turkish Aerospace Industries) ընկերությունը։

«ATAK»-ի առավելագույն արագությունը 269 կմ/ժ է, կարող է անցնել 561 կմ, բարձրացնել մինչև 1.2 տոննա զինամթերք։ Զինված է հակատանկային կառավարվող հրթիռներով, «օդ-օդ» տեսակի հրթիռներով, 70մմ կառավարվող և չկառավարվող հրթիռներով, 20մմ թնդանոթային համակարգով, 12.7 մմ գնդացրով:

Աղբյուր` Ermenihaber.am