Բահչելի. «Եթե հանկարծ թուրք ազգի վրա մատ թափ տան, այդ մատը կկոտրենք»

Տարածաշրջան13:43, 03 Հոկտեմբեր 2017

Բահչելի. «Եթե հանկարծ թուրք ազգի վրա մատ թափ տան, այդ մատը կկոտրենք»

Թուրքիայի «Ազգայնական շարժում կուսակցության» (ԱՇԿ-MHP) նախագահ Դևլեթ Բահչելին խոսել է իրաքյան Քուրդիստանի անկախության հանրաքվեից հետո ստեղծված իրավիճակի մասին: «Sabah» թերթի կայքի հաղորդմամբ՝ անդրադառնալով այն հարցին, թե ինչ կարող է Թուրքիան իրականացնել ի պատասխան քրդերի հանրաքվեին, Բահչելին մասնավորապես ասել է.

«Տրամաբանական դիրքորոշում է, որ մեր երկիրը Իրանի և Իրաքի հետ հարաբերություններում աշխուժություն է մտցնում: Քիրքուքը թուրքական է: Երեկ թուրքական էր: Ապագայում էլ թուրքական է լինելու: Եթե հանկարծ թուրք ազգի վրա մատ թափ տան, այդ մատը կկոտրենք: Թուրք ազգի համար այնքան էլ դժվար չէ հանկարծակի մի գիշեր հայտնվել Քանդիլում և Էրբիլում: Երբեք էլ դժվար չի լինելու»:

Բահչելին նկատել է տվել, որ Թուրքիայի Դուզջե քաղաքից դեպի Քիրքուք և Մոսուլ այնքան էլ հեռու չէ:

Հիշեցնենք, որ «մի գիշեր հանկարծակի կհայտնվենք» արտահայտությունը կիրառել էր նաև Թուրքիայի նախագահը, երբ քննադատել էր իրաքյան Քուրդիստանում տեղի ունեցած անկախության հանրաքվեն։

Աղբյուր` Ermenihaber.am