Գյուլենականների հարցը ՝ Թուրքիայի Բարձրագույն զինվորականների խորհրդի օրակարգում

Տարածաշրջան11:37, 31 Հուլիս 2017

Գյուլենականների հարցը ՝ Թուրքիայի Բարձրագույն զինվորականների խորհրդի օրակարգում

Թուրքիայում Բարձրագույն զինվորական խորհրդի (YAŞ) հերթական ժողովը այս տարի տեղի կունենա օգոստոս 2-ին: Այդ մասին հայտնում է թուրքական «Haberler» լրատվամիջոցը` հղում անելով «Anadolu» լրատվական գործակալությանը:

Ժողովին, որը տեղի է ունենալու Անկարայում գտնվող Չանքայա պալատում, մասնակցելու են բարձաստիճան զինվորականներ և նախարարներ: Ժողովը նախագահելու է Թուրքիայի վարչապետ Բինալի Յըլդըրըմը:

Հանդիպմանը ներկա կլինեն Թուրքիայի զինված ուժերի գլխավոր շտաբի պետ, բանակի գեներալ Հուլուսի Աքարը, փոխվարչապետներ՝ Բեքիր Բոզդաղը, Մեհմեթ Շիմշեքը, Ֆիքրի Ըշըքը, Ռեջեփ Աքդաղը և Հաքան Չավուշօղլուն, Արդարադատության նախարար Աբդուլհամիթ Գյուլը, Արտգործնախարար Մևլութ Չավուշօղլուն, Ներքին գործերի նախարար Սուլեյման Սոյլուն, Պաշտպանության նախարար Նուրեթթին Ջանիքլին, Ցամաքային ուժերի հրամանատար, բանակի գեներալ Զեքի Չոլաքը, ռազմածովային ուժերի հրամանատար և բանակի ծովակալ Բյուլենթ Բոսթանօղլուն օդային ուժերի հրամանատար, բանակի գեներալ Աբիդին Ունալը:

Ժողովի ընթացքում օրակարգային հարցերից մեկն է լինելու Թուրքիայում ահաբեկչական համարվող գյուլենական համայնքի ներկայացուցիչների դեմ պայքարի հարցը: Սպասվում են որոշ գնդապետների և գեներալների նոր նշանակումներ և պաշտոնների բարձրացումներ:

Պարզ կդառնա նաև, թե արդյո՞ք ցամաքային, օդային և ռազմածովային ուժերի հրամանատերները կմնան իրենց պաշտոններում, թե ոչ: Ներկայիս օրենքով՝ հնարավորություն է տրվում հրամանատարների պաշտոնավարման ժամկետի ավարտից հետո դրանք երկարացնել ևս մի քանի տարով::

Սպասվում է, որ ժողովի ժամանակ ընդունվելիք որոշումները կներկայացվեն Թուրքիայի նախագահ Ռեջեփ Թայիփ Էրդողանին՝ վավերացման նպատակով:

Ավելացնենք, որ բարձրագույն զինվորական խորհրդի նիստերը Թուրքիայում գումարվում են տարին երկու անգամ։ Առաջինը օգոստոսին, իսկ երկրորդի ժամկետը որոշում է երկրի վարչապետը։

Աղբյուր` Ermenihaber.am