Ամերիկացի պաշտոնյա. «Թուրքիայի հետ կիսվում ենք Սիրիայի քրդական ուժերին տրամադրվելիք զենքերի մանրամասներով»

Տարածաշրջան12:29, 02 Հունիս 2017

Ամերիկացի պաշտոնյա. «Թուրքիայի հետ կիսվում ենք Սիրիայի քրդական ուժերին տրամադրվելիք զենքերի մանրամասներով»

ԱՄՆ-ի կողմից ղեկավարվող «Իսլամական պետություն» ահաբեկչական կազմակերպության դեմ պայքարի դաշնակցային ուժերի խոսնակ Ալբայ Ռայան Դիլլոնը մեկնաբանել է Սիրիայի քրդերին զինելու իրենց որոշումը:

Միջանկյալ նշենք, որ քրդերին զինելու որոշումը մեծապես անհանգստացրել էր պաշտոնական Անկարային, քանի որ ըստ վերջինիս՝ դա սպառնում է երկրի անվտանգությանը: Ու բացի այդ Թուրքիան Սիրիայի քրդական «Ժողովրդական ինքնապաշտպանության ջոկատներին» (YPG) համարում է ահաբեկչական կազմակերպություն:

«Մեր կողմից մատակարարված զենքերի տեսակների հարցում` Թուրքիայի նկատմամբ թափանցիկ վերաբերմունք ունենք: Թուրքիայի հետ կկիսվենք Սիրիայի քրդական ուժերին տրամադրվելիք զենքերի մանրամասներով: Մենք հաշվետու ենք մեր կողմից տրամադրվելիք զենքերի հարցում»,-ասել է Դիլլոնը։

Թուրքական աղբյուրը նշում է, որ մայիսին ԱՄՆ-ի նախագահ Դոնալդ Թրամփը վավերացրեց, այն որոշումը, ըստ որի ՝ ամերիկյան կողմը պետք է զենք մատակարարի Սիրիայի քրդերին՝ «Իսլամական պետություն» (ԻՊ) ահաբեկչական կազմակերպության դեմ պայքարում:

Ըստ որոշման՝ արդեն այս շաբաթվա ընթացքում զենքերի առաջին խմբաքանակը կհասցվի Սիրիայի քրդական ուժերին:

Հիշեցնենք, որ մայիսի 31-ին Թուրքիայում նախագահ Ռեջեփ Թայիփ Էրդողանի գլխավորությամբ տեղի ունեցած ազգային անվտանգության խորհրդի նիստում քննադատության ենթարկվեց ամերիկյան կողմի նշյալ որոշումը: Նշվեց, որ այդ ամենը հակասում է Թուրքիա-ՆԱՏՕ դաշնակցային հարաբերություններին: