«Օսմանյան լեյտենանտը» տապալվել է թուրքական վարձույթում

Հասարակական10:16, 30 Մայիս 2017

«Օսմանյան լեյտենանտը» տապալվել է թուրքական վարձույթում

Հոլիվուդյան աստղերի մասնակցությամբ նկարահանված «Օսմանյան լեյտենանտը» ֆիլմը տապալվել է նաև Թուրքիայում: Այս մասին թուրքական «Sabah» թերթի սյունակում գրում է հոդվածագիր Մևլյութ Թեզելը: Ըստ նրա՝ չնայած ֆիլմից սպասելիքները մեծ էին, սակայն Հոլիվուդում բացասական արձագանք ստացած թուրք-ամերիկյան արտադրության ֆիլմը քննադատեցին նաև թուրք կինոքննադատները:

40 միլիոն բյուջեով «Օսմանյան լեյտենանտը» ցուցադրվել է 250 կինոթատրոնում և առաջին 3 օրվա ընթացքում ֆիլմը դիտել է 25 հազար 413 մարդ:

«Ֆիլմը ամերիկացի հանդիսատեսից ավելի շատ թուրքերին պետք է գրավեր, սակայն դա էլ չեղավ: «Օսմանյան լեյտենանտը» Թուրքիայում ցուցադրության առաջին 3 օրերին հավաքել է 88 հազար 656 դոլար, իսկ ԱՄՆ-ում՝ 149 հազար 830 դոլար: Կարճ ասած 40 միլիոն դոլարը նետեցին աղբարկղը»:

Թեզելի կարծիքով՝ ֆիլմի անհաջողությունը պայմանավորված է մարքեթինգային և նկարահանման ընթացքում կատարված սխալներնով: Թեզելի համազմամբ՝ այդ սխալներից մեկն էլ ռեժիսորի՝ Ջոզեֆ Ռուբենի ընտրություններ էր:

Նշենք, որ Հոլիվուդի նշանավոր դերասաններ Բեն Քինգսլիի, Ջոշ Հարթնեթի, Միխիլ Հյոյսմանի մասնակցությամբ նկարահանված ֆիլմի դեպքերը զարգանում են 1-ին համաշխարհային պատերազմի տարիներին: Ֆիլմում հիմնական պատմությունը զարգանում է թուրք սպայի, ամերիկացի բժշկի և ամերիկացի բուժքրոջ սիրային եռանկյունու շուրջ, իսկ հետին պլանում Օսմանյան կայսրությունում տեղի ունեցող իրադարձություններն են, որոնք ներկայացնում են թուրքական իշխանությունների պաշտոնական թեզերը:

Աղբյուր` Ermenihaber.am