Գերմանական հիմնադրամները Թուրքիայում մեդիայի հարձակումների թիրախ են դարձել

Հասարակական14:01, 25 Մայիս 2017

Գերմանական հիմնադրամները Թուրքիայում մեդիայի հարձակումների թիրախ են դարձել

Թուրքիայում գործունեություն ծավալող գերմանական հիմնադրամները թիրախավորվել են: Թուրքական «Odatv.com» լրատվակայքի համաձայն՝ թուրքական իշխանություններին մոտ կանգնած լրատվամիջոցները գերմանական հիմնադրամներին մեղադրում են սադրիչ և լրտեսական գործունեության մեջ, նույնիսկ պնդում են, որ դրանցից որոշները կապված են ահաբեկչական խմբավորում համարվող Գյուլենական համայնքի (FETÖ) հետ:

Գերմանական հիմնադրամների նկատմամբ թուրք հասարակության մեջ հետզհետե սաստկացող անհանդուրժողականության պատճառով 25 տարուց ավելի Թուրքիայում գործող «Friedrich-Ebert» հիմնադրամի շենքի վրայից հեռացվել է ընկերության անունը կրող ցուցանակը:

Հիմնադրամի տնօրեն Ֆելիքս Շմիդտը թեմայի վերաբերյալ հետևյալ մեկնաբանությունն է արել. «Վերջին շրջանում մենք հաճախ ենք հայտնվում հատկապես ազգայնական լրատվամիջոցների թիրախում: Պնդում են, թե մենք Գերմանիայի հետախուզության կողմից հատուկ առաջադրանք ենք ստացել՝ կործանարար գործունեություն ծավալելու:

Մեզ նույնիսկ մեղադրում են ահաբեկիչներին և քրդական տարածքներում «Քուրդիստանի բանվորական կուսակցությանը» (ՔԲԿ-PKK) աջակցելու մեջ: Ասում են նաև, իբր մենք սատարում ենք Թուրքիայում ահաբեկչական խմբավորում համարվող գյուլենական շարժմանը: Ահա այդ պատճառով ենք մենք հեռացրել հիմնադրամի ցուցանակը»:

Շմիդտը նշել է, որ իրենք մտահոգություն ունեն, թե հիմնադրամը կարող է հարձակման ենթարկվել: Թեև մինչ այժմ նման իրավիճակներ երբեք չեն հանդիպել, սակայն լրատվամիջոցներից մեկը վերջերս գրել էր, թե գերմանական հիմնադրամները «նենգ օձեր» են, իսկ «Friedrich-Ebert» հիմնադրամը՝ դրանց պարագլուխը: Սոցցանցերում ևս գերմանացիներին ուղղված ատելության հայտարարություններ և սպառնալիքներ են հնչեցվում:

Աղբյուր` Ermenihaber.am