ERMENI HABER AJANSI

«Քուրդիստանի բանվորական կուսակցության» (PKK-ՔԲԿ) զինյալներն Իրաքի Քիրքուք քաղաքում ամերիկյան արտադրության 2 զրահամեքենաների ուղեկցությամբ զորահանդես են անցկացրել:

Ըստ թուրքական «Haberler.com» լրատվական կայքի` մարտի 29-ին տեղի ունեցած միջոցառման լուսանկարում երևացող զրահամեքենաներն այս պահին ԱՄՆ-ի բանակում սպառազինության մեջ ամենաշատ կիրառվող մեքենաներից են:

Լրատվամիջոցի տեղեկացմամբ՝ հայտնի չէ, թե դրանք ինչ ճանապարհով են հայտնվել Թուրքիայում ահաբեկչական հայտարարված կազմակերպության ձեռքում:

Նշվում է, որ «Իսլամական պետություն» (ԻՊ) ահաբեկչական խմբավորման դեմ պայքարի նպատակով ԱՄՆ-ն այդպիսի զրահամեքենաներ տրամադրել է «Սիրիայի ժողովրդավարական ուժեր»-ին, որոնց հիմնական մասը կազմում են Սիրիայի քրդերի` «Ժողովրդի պաշտպանության ուժեր» (YPG-ԺՊՈՒ) կոչվող զինված ջոկատները: Չի բացառվում նաև, որ PKK-ի զինյալներն այդ զրահամեքենաները վերցրած լինեն հարակից տարածքներում պարտության մատնված ու նահանջած ԻՊ-ի գրոհայիններից:

Հիշեցնենք, որ վերջին ժամանակներում Քիրքուքում իրենց դիրքերն ամրապնդած քրդերի պահանջով մարտի 28-ին քաղաքի խորհրդի կողմից կայացված որոշման համաձայն պաշտոնական շենք-շինությունների վրա Իրաքի դրոշի հետ միասին բարձրացվել է նաև Իրաքի քրդական ինքնավարության դրոշը:

Այս առիթով հայտարարություն էր տարածել Թուրքիայի արտգործնախարարությունը` անընդունելի համարելով Քիրքուքի քաղաքային խորհրդում կայացված որոշումը:

Հայտարարության մեջ նշվել էր, որ որոշումը կայացվել է միակողմանի՝ անտեսելով խորհրդի թուրքմեն և արաբ անդամների բոյկոտը:

Քիրքուքը, որը խոշորագույն գազա-նավթային հանքավայրերից է, մշտապես եղել է հիմնականում արաբների, քրդերի և թուրքոմանների կռվախնձորը: Այն ընդգրկված է Իրաքի վիճելի տարածքների մեջ և համարվում է Բաղդադի, Էրբիլի և Անկարայի միջև գոյություն ունեցող հակասությունների պատճառ:
Քիրքուքի խնդիրը գլուխ բարձրացրեց նաև իրաքյան հակամարտության ժամանակ (2014 թ.), երբ քրդերն, օգտվելով ստեղծված իրավիճակից, ամբողջովին վերցրեցին այն՝ հայտարարելով Իրաքյան Քուրդիստանի անբաժանելի մաս: