Թուրքիայում ընտրակաշառք են առաջարկում բանտարկյալներին

Իրավական07:43, 18 Մարտ 2017

Թուրքիայում ընտրակաշառք են առաջարկում բանտարկյալներին

Թուրքիայում ապրիլի 16-ին անցկացվելիք սահմանադրական փոփոխությունների հանրաքվեին ընդառաջ իշխանությունները ընտրակաշառք են խոստանում նույնիսկ բանտարկյալներին: Այս մասին գրում է թուրքական «İlerihaber.org» լրատվակայքը:

Աղբյուրի համաձայն՝ Էլազըղի (Խարբերդ) փակ ռեժիմով կալանավայրի ղեկավարությունը հավաքել է բոլոր բանտարկյալներին և նրանց պարտադրել «այո» ասել հանրաքվեում:

Նշյալ կալանավայրի քաղբանտարկյալներից Բեդրեթթին Ադըգյուզելը այս մասին նամակով տեղեկացրել է Թուրքիայի «Մարդու իրավունքների միությանը» (İHD): Նամակում ասվում է, որ իշխող «Արդարություն և զարգացում» կուսակցությունը (ԱԶԿ-AKP) դրական քվեի դիմաց խոստացել է 5 տարով նվազեցնել բոլոր բանտարկյալների պատժաչափը: Իսկ ընտրելու իրավունք չունեցող բանտարկյալների դեպքում համապատասխան հրահանգներ են տրվել նրանց ընտանիքի անդամներին:

Թուրքական լրատվամիջոցները փորձել են այս պնդումների վերաբերյալ մեկնաբանություններ ստանալ Էլազըղի կալանավայրի ղեկավարությունից՝ հեռախոսազանգի միջոցով: Սակայն բանտի ղեկավարները հրաժարվել են խոսել այս թեմայով:

Հավելենք, որ Ադըգյուզելի նամակում տեղ են գտել նաև բանտի պայմաններին վերաբերող նկարագրություններ.

«Որպես քաղբանտարկյալներ՝ մենք ենթարկվում ենք տարբեր կամայականությունների, որոնք պատճառաբանվում են արտակարգ դրությամբ և օրենքի ուժ ունեցող որոշումներով: Այստեղ բանտախցերում 12-13-ական մարդ կա: Հիգիենիկ պայմանները ծայրահեղ վատ են և մեծ է վարակների ու հիվանդությունների տարածման ռիսկը», -նշել է նա: Ադըգյուզելը հավելել է, որ բանտարկյալները տարբեր պատրվակներով պարբերաբար զրկվում են շաբաթական 1-2 անգամ սպորտով զբաղվելու իրենց իրավունքից, սահմանափակված են նաև ընտանիքի անդամների հետ հանդիպումները:

Աղբյուր` Ermenihaber.am