Ըստ քուրդ գործչի՝ Թուրքիան Սիրիայում ռազմաբազաներ է հիմնում

Տարածաշրջան14:11, 01 Մարտ 2017

Ըստ քուրդ գործչի՝ Թուրքիան Սիրիայում ռազմաբազաներ է հիմնում

Թուրքիան ռազմաբազաներ է հիմնում Սիրիայի մի շարք շրջաններում: Ըստ թուրքական «Sputniknews» լրատվամիջոցի թուրքական ծառայության` այդ մասին հայտարարել է Սիրիայի քրդական ուժերին մոտ կանգնած «Դեմոկրատական Սիրիայի խորհրդարան» կազմակերպության ղեկավար Ռեզան Հիդդոն:

Վերջինիս պնդմամբ` նշյալ ռազմաբազաներից որոշները ստեղծվել են այն բանից հետո, երբ Թուրքիայի զինուժը Սիրիայի տարածքում սկսեց «Եփրատի վահան» գործողությունը:

«Դուք էլ գիտեք, որ մենք Էլ Բաբ չենք գնում, քանի որ այնտեղ Թուրքիան է և Սիրիայի Ազատ բանակը: Էլ Բաբում և հարակից վայրերում բնակվող մարդիկ որոշ տեղեկություններ են մեզ հաղորդել: Այդ տեղեկությունների համաձայն` Թուրքիան Աքիլ Սարի մոտ (գտնվում է Էլ Բաբի մոտ-խմբ.) ռազմաբազա է հիմնում: Նաև Ազեզի մոտակայքում է ռազմաբազա ստեղծում»:

Ըստ Հիդդոյի՝ այդ ռազմաբազաների ստեղծումն ամենևին ուղղված չէ ահաբեկչության դեմ պայքարին:

«Թուրքիան շարունակ խոսում է «Missak-I Milli» (Ազգային ուխտի) սահմանների մասին: Թուրքիայի նախագահ Ռեջեփ Թայիփ Էրդողանն անձամբ խոսեց դրա մասին: Թուրքիան ցանկանում է իրեն կցել Հալեպի, Ջերաբլուսի և Շեհբայի շրջանները: Սա է Թուրքիայի ծրագիրը»:

Հիշեցնենք, որ «Ազգային ուխտ»-ը ընդունել է Օսմանյան կայսրության խորհրդարանը 1920թ. հունվարի 28-ին՝ քեմալականների ճնշմամբ։ Ազգային ուխտի սկզբունքները մշակվել էին քեմալականների՝ 1919թ. սեպտեմբերին Սեբաստիայում (Սվազում) կայացած կոնգրեսում։ Դրա հիմքում հիմքում ընկած էր «ազգային սահմանի» սկզբունքը, որը պահանջում էր Թուրքիայի տարածք ճանաչել այն բոլոր հողերը, որոնք Օսմանյան կայսրության կազմում էին Մուղրոսի զինադադարի (1918) կնքման պահին՝ առանց արաբական երկրների: «Ազգային ուխտ»ը ոտնահարում էր թուրքական լծի տակ գտնվող ժողովուրդների՝ հույների, քրդերի, ասորիների և այլոց կենսական շահերը, սակայն ամենամեծ հարվածը հասցնում էր հայ ժողովրդին, բացառելով միացյալ և անկախ Հայաստանի ստեղծումը Փոքր Ասիայի արևելքում։

Աղբյուր` Ermenihaber.am