Թուրքական զորքերը մտել են Ալ-Բաբ՝ տալով զոհեր ու վիրավորներ

Տարածաշրջան13:05, 08 Փետրվար 2017

Թուրքական զորքերը մտել են Ալ-Բաբ՝ տալով զոհեր ու վիրավորներ

Սիրիայի հյուսիսում Թուրքիայի կողմից իրականացվող «Եփրատի վահան» ռազմագործողության շրջանակներում «Իսլամական պետություն» (ԻՊ) ահաբեկչական կազմակերպության հետ այսօր առավոտյան տեղի ունեցած բախումների հետևանքով թուրքական կողմը կրկին կորուստեր է տվել:

Ըստ թուրքական «Haberler.com» լրատվական կայքի` ԻՊ-ի վերահսկողության տակ գտնվող Ալ-Բաբի մատույցներում տեղի ունեցած բախումների հետևանքով 2 թուրք զինվորական է զոհվել, ևս 15-ը` վիրավորվել:

Այս կապակցությամբ հայտարարությամբ է հանդես եկել նաև Թուրքիայի զինված ուժերի գլխավոր շտաբը` հաստատելով կորուստների փաստը:

Այսպիսով, արդեն 169 օր շարունակվող ռազմագործողության շրջանակներում, ըստ պաշտոնական տվյալների, թուրքական կողմի մարդկային կորուստները հասան 58-ի:

Նշվում է նաև, որ թուրքական օդուժի հարվածների հետևանքով ոչնչացվել է իսլամականների 254 թիրախ ու պատճառվել շուրջ 50 մարդկաին կորուստ:

Թուրքական «Sabah» իշխանամետ թերթի կայքի տարածած հրապարակման համաձայն էլ թուրքական ջոկատներին արդեն հաջողվել է մուտք գործել Ալ-Բաբի կենտրոն:

«Մեր ջոկատները հասել են Ալ-Բաբի կենտրոն: Ասադի ուժերի հետ չբախվելու նպատակով խորհրդակցություններ ենք անցկացնում Ռուսաստանի հետ»,-ըստ թերթի` ասել է Թուրքիայի նախագահի մամուլի քարտուղար Իբրահիմ Քալընը:

Ավելացնենք, որ հյուսիսից թուրքական զորքերով ու «Սիրիական ազատ բանակ» կոչվող զինված ընդդիմադիր ջոկատների կողմից շրջափակված Ալ-Բաբը հարավից էլ շրջափակվել էր Սիրիայի կառավարական ուժերի կողմից:

Հիշեցնենք, որ սիրիական սահմանային Ջերաբլուս քաղաքն ահաբեկիչներից մաքրելուն ուղղված օպերացիայի շրջանակներում օգոստոսի 24-ի վաղ առավոտյան կոալիցիոն ուժերի աջակցությամբ Թուրքիայի զինված ուժերը «Եփրատի վահան» անվամբ լայնամասշտաբ գործողություններ սկսեցին: Ահաբեկիչնեի դեմ հիմնական ցամաքային գործողություններն իրականացնում են «Սիրիայի ազատ բանակ» կոչվող զինված ընդդիմության մարտիկները՝ Թուրքիայի մի քանի հարյուր հատուկջոկատայինների և հրետանային ստորաբաժանումների մասնակցությամբ:

Բացի ԻՊ-ի զինյալներից, Թուրքիան նաև հարվածներ է հասցնում Սիրիայի քրդական ուժերին, որին պաշտոնական Անկարան նույնպես դիտարկում է որպես ահաբեկչական կազմակերպություններ:

Աղբյուր` Ermenihaber.am