Թուրքիայում գյուլենականների ստացած եկամուտների մասին զեկույց է հրապարակվել

Տարածաշրջան10:32, 08 Փետրվար 2017

Թուրքիայում գյուլենականների ստացած եկամուտների մասին զեկույց է հրապարակվել

Անկարայի հանրապետական դատախազության համար զեկույց է պատրաստվել, որտեղ հրապարակվել է հայտնի իսլամական քարոզիչ Ֆեթուլլահ Գյուլենի կողմից ղեկավարված կազմակերպությունների ֆինանսական կարողություններն ու շահույթները:

Ըստ թուրքական «Akşam» թերթի կայքի` 1999 թվականից ԱՄՆ-ում բնակվող Գյուլենը իր հիմնած «Գյուլենական շարժման» միջոցով կարողացել է տարիների ընթացքում Թուրքիայում բազմաթիվ մասնավոր դպրոցներ, համալսարաններ, մշակույթի կենտրոններ ու մի շարք այլ կազմակերպություններ հիմնել ու դրանցից հսկայական շահույթ ստանալ:

Նշվում է, որ Գյուլենի ղեկավարած շարժումը, որն այժմ Թուրքիայում ահաբեկչական է հայտարարված, իրեն պատկանող 17 համալսարաններից (65.000 ուսանողով) տարեկան 1 մլրդ թուրքական լիրա (267 մլն դոլար) շահույթ է ստացել: Թուրքիայում որպես հասարակական կազմակերպություն գրանցված շարժման կողմից համակարգվող 1.060 մասնավոր դպրոցները (140.000 աշակերտով) գյուլենականներին ապահովել է տարեկան 2.1 մլրդ լիրա (561 մլն դոլար) եկամուտ:

Ուսումնական շենքերի վարձակալությունից կազմակերպությունը ապահովել է տարեկան 8 մլրդ լիրա (2.1 մլրդ դոլար) եկամուտ:

Ըստ աղբյուրի` Գյուլենը կարողացել է տասնամյակների ընթացքում իր համակիրների միջոցով վերահսկողության տակ առնել այնպիսի պետական կազմակերպություններ, որոնց միջոցով դրամաշնորհներ են տրվել երկրի տնտեսության, ենթակառուցվածքների, բիզնեսի, կրթության ու բազմաթիվ այլ ոլորտերին:

Նշվում է, որ կազմակերպությունը պետական ծառայության տարբեր ոլորտներում 2000-2013 թթ. կարողացել է աշխատանքի է տեղավորել շուրջ 300.000 համակիրի, որոնց կողմից շարժման համար արվող պարտադիր ամսական հանգանակություններից ապահովվել է տարեկան 1.1 մլրդ լիրա:

Համաձայն զեկույցի` վերոնշյալ ոլորտներից գյուլենական շարժումը տարեկան ստացել է ընդհանուր առմամբ 15 մլրդ լիրայի (4 մլրդ դոլար) եկամուտ:

Աղբյուր` Ermenihaber.am