Էրդողան. «Եթե խորհրդարանը անաշխատունակ դարձնեն, կդիտարկվի վաղաժամ ընտրությունների հարցը»

Տարածաշրջան13:48, 13 Հունվար 2017

Էրդողան. «Եթե խորհրդարանը անաշխատունակ դարձնեն, կդիտարկվի վաղաժամ ընտրությունների հարցը»

Թուրքիայի նախագահ Ռեջեփ Թայիփ Էրդողանը ուրբաթօրյա նամազից հետո լրագրողների հետ հանդիպման ժամանակ անդրադարձել է վերջին օրերին քննարկվող հավանական վաղաժամկետ ընտրությունների թեմային` չբացառելով դրա հավանականությունը:

Ըստ թուրքական «Demokrathaber.org» լրատվական կայքի` Էրդողանը մասնավորապես ասել է. «Մենք վաղաժամ ընտրությունների անցկացումը երբեք նպատակահարմար չենք համարել: Սակայն եթե խորհրդարանը անաշխատունակ դարձնեն (ակնարկում է ընդդիմադիր «Ժողովրդահանրապետական կուսակցությանը» -խմբ.), ապա այդ տարբերակն (վաղաժամ ընտրությունների) էլ կդիտարկվի»:

Էրդողանը նշել է, որ եթե խորհրդարանին հաջողվի կազմակերպել աշխատանքները և հաջորդ շաբաթվա վերջին ավարտին հասցնել սահմանադրական փոփոխությունների նախագծի հոդվածների քննարկումներն ու քվեարկությունները, ապա այդ դեպքում նախագիծը կներակայցվի հանրաքվեի:

Նշենք, որ խորհրդարանում սահմանադրական փոփոխությունների կետերի` ծեծկռտուքներով ու սկանդալներով ուղեկցվող քննարկումներն ու քվեարկությունները Թուրքիայի քաղաքական դաշտում վաղաժամ ընտրություններ անցկացնելու և նոր ձևավորված խորհրդարանում նախագիծը քննարկելու վերաբերյալ խոսակցությունների առիթ են դարձել:

Հիշեցնենք, որ Թուրքիայի խորհրդարանում սահմանադրական փոփոխությունների հոդվածների քննարկման ժամանակ լարվածություն էր առաջացել ընդդիմադիր «Ժողովրդահանրապետական կուսակցության» և իշխանական «Արդարություն և զարգացում կուսակցության» պատգամավորների միջև, ինչը րոպեների ընթացքում վերածվել էր զանգվածային ծեծկռտուքի:

Միջադեպի ժամանակ կոտրվել էր ԱԶԿ-ի պատգամավոր, կուսակցության փոխնախագահ Ֆաթիհ Շահինի քիթը, որոշ պատգամավորներ էլ ստացել էին թեթև վնասվածքներ:

Աղբյուր` Ermenihaber.am