Թուրքիայում Իրաքի դեսպան. «Թուրքական զորքը Իրաքից դուրս կգա Մոսուլի օպերացիայից հետո»

Տարածաշրջան12:16, 11 Հունվար 2017

Թուրքիայում Իրաքի դեսպան. «Թուրքական զորքը Իրաքից դուրս կգա Մոսուլի օպերացիայից հետո»

Օրերս Թուրքիայի վարչապետ Բինալի Յըլդըրըմի Բաղդադ կատարած այցի ֆոնին Անկարայում Իրաքի դեսպան Սալիհ Էլ-Օբաիդին ուշագրավ հայտարարություն է արել իր երկրից թուրքական ռազմախմբի դուրսբերման հետ կապված: Ըստ թուրքական «Haberler.com» կայքի` դեսպանը հայտարարել է, որ Իրաքի Մոսուլ քաղաքից ոչ հեռու գտնվող Բաշիքա ռազմաճամբարում տեղակայված թուրքական զորախումբը դուրս կբերվի «Իսլամական պետություն» (ԻՊ) ահաբեկչական կազմակերպության վերահսկողության տակ գտնվող Մոսուլի ազատագրումից հետո:

Ըստ Օբաիդիի` 2 երկրների միջև լարվածության պատճառ դարձած զորքերի դուրսբերման խնդրի լուծումից հետո կքննարկվեն նաև Թուրքիայի և Իրաքի միջև տարբեր ոլորտներում հնարավոր համագործակցության ծրագրերը:

Այս հայտարարությանը արձագանքել է Թուրքիայի պաշտպանության նախարար Ֆիքրի Ըշըքը` հայտարարելով, որ իրենք Իրաքում զորք են պահում անհրաժեշտությունից դրդված: Ըշըքը նշել է, որ շրջանը (Մոսուլի) ահաբեկիչներից մաքրելուց հետո կրկին կերկխոսեն Իրաքի իշխանությունների հետ և հարցը բարեկամաբար կլուծեն:

Հիշեցնենք, որ 2 երկրների միջև լարվածությունը սկսվել էր այն բանից հետո, երբ 2015թ. դեկտեմբերի 10-ին թուրքական զորաջոկատներն առանց Իրաքի կենտրոնական իշխանությունների թույլտվության ներխուժել էին իրաքյան Քուրդիստանի Մոսուլ քաղաքից 30կմ հեռավորության վրա գտնվող Բաշիքա շրջան և հաստատվել ավելի վաղ թուրքերի կողմից հիմնած ռազմակայանում: Թուրքական կողմի պնդմամբ` իրենց զորախումբը նպատակ ունի մարզել իրաքյան Քուրդիստանի զինված ուժերի` Փեշմերգայի զորաջոկատները` «Իսլամական պետություն» (ԻՊ) ահաբեկչական կազմակերպության դեմ մղվող մարտերի համար:

Աղբյուր` Ermenihaber.am