Թուրքիայի պաշտպանություն նախարարը` Էլ-Բաբում թուրքական ուժերի կորուստների մասին

Տարածաշրջան12:21, 23 Դեկտեմբեր 2016

Թուրքիայի պաշտպանություն նախարարը` Էլ-Բաբում թուրքական ուժերի կորուստների մասին

Թուրքիայի Պաշտպանության նախարար Ֆիքրի Ըշըքը Թուրքիայի խորհրդարանի լիագումար նիստի ժամանակ խոսել է դեկտեմբերի 21-ին թուրքական ուժերի և «Իսլամական պետություն» (ԻՊ) ահաբեկչական կազմակերպության միջև Սիրիայի Էլ-Բաբ քաղաքում տեղի ունեցած բախումների մասին: Ըստ թուրքական «Haberler» լրատվամիջոցի` Ըշըքի խոսքերով, բախման ժամանակ սպանված թուրք զինվորների թիվը արդեն հասել է 16-ի:

Ելույթի ընթացքում նախարարը խորհրդարանին տվյալներ է ներկայացրել Թուրքիայի կողմից օգոստոսի 24-ին Սիրիայի տարածքում սկսված «Եփրատի վահան» ռազմական գործողության վերաբերյալ:

Ըշըքի խոսքերով` Թուրքիան Սիրիայում գործողություններ է իրականացնում ոչ միայն «Իսլամական պետություն» (ԻՊ) ահաբեկչական կազմակերպության, այլև Սիրիայի քրդական ուժերի դեմ, որոնց պաշտոնական Անկարան դիտարկում է, որպես ահաբեկչական կազմակերպություն:

Ըստ Ըշըքի տրամադրած տվյալների` մինչ օրս «Եփրատի վահան» գործողության ժամանակ սպանվել է 1005 ԻՊ-ի գրոհային, բացի դրանից ոչնչացվել է ԻՊ-ին պատկանող 4 տանկ, 621 շենք, 29 հրանոթ, 61 պաշտպանական դիրք, 28 հրամանատարական կենտրոն, 17 զինպահեստ, ինչպես նաև պայթուցիկով բեռնված 11 մեքենա:

Իսկ ահա Սիրիայի քրդական «Ժողովրդավարական միություն» (ԺՄԿ-PYD) կուսակցության ռազմական թևի` «Ժողովրդական ինքնապաշտպանական ջոկատներ» (ԺԻՋ-YPG) –ի դեմ գործողությունների հետևանքով 299 զինյալ է սպանվել: Նշյալ գործողությունների ժամանակ ոչնչացվել է քրդական ուժերին պատկանող 14 շենք, 4 պաշտպանական դիրք, 5 մեքենա և 1 անօդաչու թռչող սարք:

Նախարարը մեկ անգամ ևս շեշտել թուրքական այն տեսակետը, որ իրենք երբեք չեն թողնի, որ քրդական ուժերը Սիրիայում ստեղծեն միջանցք: Այդ միջանցքը թուրքական կողմը որակում է որպես «ահաբեկչական միջանցք»:

Աղբյուր` Ermenihaber.am