Բրյուսելում մտահոգված են. Թուրքիան հետզհետե վերածվում է ավտորիտար պետության

Իրավական10:50, 01 Նոյեմբեր 2016

Բրյուսելում մտահոգված են. Թուրքիան հետզհետե վերածվում է ավտորիտար պետության

Եվրոպական կառույցները շարունակում են իրենց անհանդուրժողականությունը դրսևորել Թուրքիայում տեղի ունեցող հակաժողովրդավարական զարգացումների նկատմամբ:

Եվրախորհրդարանում (ԵԽ) Թուրքիայի հարցերով զեկուցող Քեթի Փիրին հայտարարել է, որ Թուրքիայում կատարվող իրադարձությունները Բրյուսելում խորը մտահոգություն են հարուցում: Նա ընդգծել է, որ հուլիսի 15-ի հեղաշրջումից հետո կառավարությունը ընդդիմադիր քաղաքական ուժերի և մամուլի նկատմամբ «զրոյական հանդուրժողականություն» է ցուցաբերում:

Անդրադառնալով ընդդիմադիր «Cumhuriyet» թերթի ղեկավարների և թղթակիցների ձերբակալման փաստին՝ Փիրին նշել է. «Ամեն ինչ գնալով ավելի ու ավելի է վատանում»:

ԵԽ ներկայացուցիչը հիշեցրել է նաև Դիարբեքիրի համաքաղաքապետներ Գյուլթեն Քըշանաքի և Ֆըրաթ Անլըի ձերբակալության և 15 քրդական լրատվամիջոցների գործունեության դադարեցման մասին:

«Բրյուսելում մտահոգությունը շատ մեծ է, քանի որ Թուրքիայում ուժերի հակադրություն չի մնացել: Թուրքիան հետզհետե վերածվում է ավտորիտար պետության», - նշել է Փիրին:

Նա հավելել է, որ Թուրքիայում տեղի ունեցող զարգացումներում փոփոխություն մտցնելու հարցում Եվրամիության հնարավորությունները շատ սահմանափակ են, սակայն ԵՄ-ն պետք է հստակ դիրքորոշում որդեգրի՝ ի օգուտ Թուրքիայում ժողովրդավարության կողմնակիցների:

Եվրախորհրդարանի նախագահ Մարտին Շուլց էլ Twetter-ի իր միկրոբլոգում թեմայի վերաբերյալ կատարած մի գրառմամբ քննադատել է Մուրաթ Սաբունջուի և «Cumhuriyet» թերթի մյուս լրագրողների ձերբակալությունը:

Եվրախորհուրդի գլխավոր քարտուղար Թորբյորն Յագլանդը իր հերթին ուշադրություն է հրավիրել այն հանգամանքի վրա, որ «Cumhuriyet»-ի ղեկավարների և լրագրողների ձերբակալությունների պատճառով Թուրքիան կարող է բազմաթիվ դատավարությունների հետ գործ ունենալ:

«Եթե արտակարգ դրության ռեժիմը շարունակաբար չարաշահվի, ապա Թուրքիայի դեմ Մարդու իրավունքների եվրոպական դատարանում կարող են բազմաթիվ դատական գործեր հարուցվել», - նշել է Յագլանդը:

Նա հիշեցրել է, որ անգամ արտակարգ իրադրության պայմաններում անհրաժեշտ է հավատարիմ մնալ Մարդու իրավունքների եվրոպական կոնվենցիայի դրույթներին:

«Անհրաժեշտ է զգուշությամբ միմյանցից զատել բռնության կողմնակից ահաբեկչական գործողությունների միջոցով կառավարության քննադատումն ու ընդդիմադիր հայտարարութունները: Քանի որ խոսքի ազատությունը ժողովրդավարական հասարակության անհրաժեշտ հիմնաքարերից մեկն է», - հավելել է Եվրախորհրդի գլխավոր քարտուղարը: