Թուրք դեսպանը գոհ է ռուս-թուրքական հարաբերությունների կարգավորման գործընթացից

Քաղաքական07:53, 04 Հոկտեմբեր 2016

Թուրք դեսպանը գոհ է ռուս-թուրքական հարաբերությունների կարգավորման գործընթացից

Ռուսաստանի Դաշնությունում (ՌԴ) Թուրքիայի արտակարգ և լիազոր դեսպան Ումիթ Յարդըմը լրագրողների հետ խոսել է ռուս-թուրքական հարաբերությունների և տարածաշրջանային խնդիրների մասին:

«Haberrus» լրատվական կայքը, հղում անելով ռուսական «RIA» լրատվական գործակալությանը, նշում է, որ դեսպանի գոհունակություն է հայտնել ռուս-թուրքական հարաբերությունների կարգավորման գործընթացի տեմպերից:

Յարդըմն ընդգծել է, որ Սիրիայի և մի շարք այլ հարցերի լուծման նպատակով բանակցելու և խորհրդակցություններ անցկացնելու համար Թուրքիան և Ռուսաստանը չունեն անհաղթահարելի խոչընդոտներ:

Սիրիայի հարցում կողմերն ունեն ընդհանուր շահեր: Մասնավորապես երկու երկրներն էլ նպատակ ունեն Սիրիայում պայքարել ահաբեկչության դեմ: Դեսպանը տեղեկացրել է, որ սիրիական ճգնաժամի կարգավորման ուղղությամբ այժմ Ռուսաստանի և Թուրքիայի նախարարները հաճախակի հանդիպումներ և հեռախոսազրույցներ են ունենում:

Թուրքական «Yenidunyagundemi» լրատվական կայքն էլ հաղորդում է, որ դեսպանը հարցազրույցի ժամանակ ասել է, որ ինքը լքում է Ռուսաստանում Թուրքիայի արտակարգ և լիազոր դեսպանի պաշտոնը: Ավելի վաղ թուրքական մամուլում որպես Յարդըմին փոխարինող շրջանառվում էր Հուսեյն Դիրոզի անունը, ով նախկինում Բրազիլիայում Թուրքիայի դեսպանն էր:

Աղբյուր` Ermenihaber.am