Թուրք վերլուծաբանը ներկայացնում է Թուրքիայում նոր երևակայական հեղաշրջման սցենարը

Տարածաշրջան07:33, 30 Սեպտեմբեր 2016

Թուրք վերլուծաբանը ներկայացնում է Թուրքիայում նոր երևակայական հեղաշրջման սցենարը

Թուրքական «Milat» թերթի սյունակագիր Ահմեթ Այը անդրադարձել է Թուրքիայում նոր հեղաշրջման և դրա հավանական հետևանքների թեմային: «Նոր հեղաշրջում է մոտենում» հոդվածում Այը ներկայացնում է ենթադրյալ հեղաշրջման չափազանցված պատկերը՝ նպատակ ունենալով ցույց տալ, թե որքան սխալ ու աննպատակահարմար է նմանատիպ հոդվածներով ու խոսակցություններով հասարակության մեջ տագնապ ու խուճապ առաջացնել:

Հոդվածն ուղղված է հիմնականում այն թուրք լրագրողներին, որոնք վերջին օրերին ավելի ու ավելի հաճախ են գրում Թուրքիայում ակնկալվող նոր հեղաշրջումների և դրանց վատթար հետևանքներ մասին:

«Երկրորդ հեղաշրջումը մոտենում է: Այս անգամ նախորդի նման չի լինի: Մեկ գիշերում 20 միլիոն բնակիչ կսպանվի: Դրանով էլ չբավարարվելով՝ մարդասպան ուժերը մնացած 60 միլիոնից 50 միլիոնին կվիրավորեն ու գերի կվերցնեն:

Նախ արևմտյան կոալիցիայի ուժերի միջոցով Ստամբուլը կշրջափակվի, հետո ՆԱՏՕ-ի զորքերը Իզմիրը կտան հույներին…

Ֆրանսիացիների աջակցությամբ Շանլըուրֆայում կհիմնվի Նեմրութ պետույթունը: Չյոլեմերիկ ինքնավար հանրապետության հռչակումից հետո Վանը Իրանի կողմից կօկուպացվի և կհիմնվի Վանի շիական հանրապետությունը: Այդ հանգամանքի դեմ կընդվզեն Կարսն ու Աղրըն, որոնք կսկսեն պայքարել Հայաստանին միանալու համար»:

Ահմեթ Այը ներկայացնում է նաև Թուրքիայի տարածքում մի շարք այլ երևակայական հանրապետությունների և ինքնավար շրջանների ստեղծման հավանական սցենարը:

Վերջում հեղինակը կոչ է անում թուրք լրագրողներին չափավոր լինել նմանատիպ բովանդակությամբ հոդվածներ գրելիս և սահմանափակվել միայն զգուշավորության կոչ անելով՝ առանց ուռճացված ու չափազանցված կանխատեսումների:

Աղբյուր` Ermenihaber.am