Էրդողանը ստորագրել է Իսրայելի հետ հարաբերությունների կարգավորման համաձայնագիրը

Քաղաքական13:23, 31 Օգոստոս 2016

Էրդողանը ստորագրել է Իսրայելի հետ հարաբերությունների կարգավորման համաձայնագիրը

Թուրքիայի նախագահ Ռեջեփ Թայիփ Էրդողանն այսօր ստորագրել է Թուրքիայի Հանրապետության և Իսրայել Պետության միջև հարաբերությունների կարգավորման համաձայնագիրը հաստատող օրենքը: Օրենքը, որը ավելի վաղ` օգոստոսի 20-ին, հաստատվել էր Թուրքիայի խորհրդարանի կողմից, նախագահ Էրդողանի ստորագրությամբ պաշտոնապես ուժի մեջ մտավ:

Ըստ թուրքական «Sondakika.com» լրատվական կայքի` համաձայնագրի շրջանակներում Իսրայելը 20 մլն դոլար փոխհատուցում կվճարի 2010-ի մայիսի 31-ին տեղի ունեցած «Մավի Մարմարա»-ի միջադեպի հետևանքով զոհված Թուրքիայի 10 քաղաքացիների հարազատներին: Գումարը 25 աշխատանքային օրվա ընթացքում կուղարկվի Թուրքիայի կառավարության բացած հաշվեհամարին:

Հիշեցնենք, որ Թուրքիայի և Իսրայելի հարաբերությունները սրվել էին «Մավի Մարմարա» նավի միջադեպից հետո: Իսրայելցի զինվորները 2010 թ-ի մայիսի 31-ին հարձակվել էին թուրքական «Մավի Մարմարա» նավի վրա, որը միջազգային մարդասիրական նավաշարասյան կազմում օգնություն էր փոխադրում Պաղեստինի Գազայի հատված: Թել Ավիվը պահանջել էր նավի վրա բեռների ստուգում անցկացնել: Երբ նավի անձնակազմը հրաժարվել էր ենթարկվել պահանջին, իսրայելցի զինվորների հարձակման էին անցել: Հարձակման հետևանքով զոհվել էր Թուրքիայի 10 քաղաքացի:

Աղբյուր` Ermenihaber.am