Չավուշօղլու. ԱՄՆ-ն PYD-ի հարցում պետք է իր խոստումը պահի

Տարածաշրջան09:02, 16 Օգոստոս 2016

Չավուշօղլու. ԱՄՆ-ն PYD-ի հարցում պետք է իր խոստումը պահի

Թուրքիայի արտաքին գործերի նախարար Մևլութ Չավուշօղլուն երկրի ընդդիմադիր «Ժողովրդահանրապետական կուսակցության» (ԺՀԿ-CHP) նախագահ Քեմալ Քըլըչդարօղլուի հետ կայացած հանդիպումից հետո, լրագրողների հետ խոսել է մի շարք առանցքային հարցերի մասին:

Ինչպես հաղորդում է թուրքական «Yeniakit» թերթի կայքը, Չավուշօղլուն անդրադարձել է թուրք-իսրայելական հարաբերություններին, «Իսլամական պետություն» ահաբեկչական կազմակերպության դեմ պայքարին Սիրիայի քրդական «Ժողովրդավարական միություն կուսակցության» (ԺՄԿ-PYD) մասնակցության մասին:

Թուրքիայի ԱԳՆ ղեկավարի խոսքերով՝ թուրք իսրայելական հարաբերությունների կարգավորման գործընթացում վճռորոշ դեր են խաղալու թուրքական կուսակցությունները, ինչպես նաև հենց Թուրքիայի ԱԳՆ-ն:

Անդրադառնալով Սիրիայի Մենբիչ քաղաքում ԻՊ-ի դեմ սպասվող օպերացիային, Չավուշօղլուն ասել է, որ ԱՄՆ-ն Թուրքիային խոսք է տվել, որ այն բանից հետո, երբ քաղաքը ազատագրվի ԻՊ-ի զինյալներից, PYD-ի ուժերը չեն անցնի դեպի Եփրատ գետի արևելյան մաս: Նա չափազանց կարևորել է, որ ԱՄՆ-ն իր խոստումը պահի այդ հարցում: ԱԳՆ-ի ղեկավարը մեկ անգամ ևս կրկնել է Թուրքիայի պաշտոնական դիրքորոշումը այն մասին, որ սիրիական ճգնաժամը լուծելու համար Ասադը պետք է հեռանա:

«ԱՄՆ-ն PYD-ի հարցում պետք է իր խոստումը պահի», - ընդգծել է Թուրքիայի ԱԳՆ-ի ղեկավարը

Արտգործանախարարը լրագրողներին հայտնել է նաև, որ օգօստոսի 23-24 ընկած ժամանահատվածում Թուրքիա է այցելելու ԱՄՆ-ի փոխնախագահ Ջո Բայդենը: Օրակարգային հարցերից է լինելու իսլամի քարոզիչ , ամերիկաբնակ միլիարդատեր Ֆեթթուլահ Գյուլենի արտահանձման հարցը:

Աղբյուր` Ermenihaber.am