Ավստրիայի վարչապետն առաջարկում է դադարեցնել Թուրքիայի հետ ԵՄ անդամակցության բանակցությունները

Քաղաքական09:05, 04 Օգոստոս 2016

Ավստրիայի վարչապետն առաջարկում է դադարեցնել Թուրքիայի հետ ԵՄ անդամակցության բանակցությունները

Թուրքիայում հուլիսի 15-ին տեղի ունեցած ռազմական հեղաշրջման փորձից հետո Ավստրիայի իշխանությունները թուրքական իշխանություններին քննադատող հայտարարություններ են արել: Այս մասին հայտնում է թուրքական «Yenisafak» թերթը` մատնանշելով Ավստրիայի վարչապետ Քրիստիան Քերնի հայտարարությունները: Նա հուլիսի 15-ից հետո հայտնել էր, որ Եվրոպայի առաջնորդների հետ երկխոսություն է սկսելու Թուրքիայի՝ ԵՄ անդամակցության շուրջ բանակցությունները դադարեցնելու համար: Քերնն իր այս որոշումը բացատրել էր Թուրքիայում առկա ժողովրդավարական և տնտեսական թերություններով:

«Բոլորս էլ գիտենք, որ Թուրքիայի ժողովրդավարական չափանիշները ԵՄ անդամակցության համար բավարար մակարդակի վրա չեն: Տնտեսական հարցերը նույնչափ կարևոր են, իսկ Թուրքիայի տնտեսությունը եվրոպական միջինից շատ հեռու է»:

Վարչապետը նաև նշել է, որ Թուրքիայի հետ ԵՄ բանակցությունների դադարեցման հարցը կբերեն սեպտեմբերի 16-ին կայանալիք Եվրախորհդրի նիստի օրակարգ՝ ցանկանալով այդ հարցի համար այլընտրանքային հայեցակարգ մշակել:

Ըստ նույն աղբյուրի՝ բացի վարչապետից Թուրքիայի իշխանություններին քննադատող և հեղաշրջման փորձը կազմակերպողներին աջակցող հայտարարություններ է արել նաև Ավստրիայի արտգործնախարար Սեբաստիան Կուրցը:

Նշվում է, որ հեղաշրջման փորձից հետո Վիեննայի օդանավակայանում մի պաստառ է փակցվել, որը մարդկանց հորդորում է Թուրքիա չմեկնել, քանի որ այդ կերպ աջակցում են Թուրքիայի նախագահ Ռեջեփ Թայիփ Էրդողանին:

Աղբյուր` Ermenihaber.am