Եթե ԱՄՆ-ն չհանձնի Գյուլենին, ապա դա կազդի թուրք-ամերիկյան հարաբերությունների վրա

11:21, 25 Հուլիս 2016

Եթե ԱՄՆ-ն չհանձնի Գյուլենին, ապա դա կազդի թուրք-ամերիկյան հարաբերությունների վրա

Թուրքիայի արտգործնախարար Մևլութ Չավուշօղլուն թուրքական «Habertürk» հեռուստաընկերությանը հարցազրույց է տվել, որի ժամանակ խոսել է ԱՄՆ-ում բնակվող իսլամի գործիչ Ֆեթթուլահ Գյուլենի արտահանձման, ինչպես նաև առաջիկայում սպասվող Պուտին-Էրդողան հանդիպման մասին:

Չավուշօղլուն, խոսելով Գյուլենի մասին, ասել է. «Եթե ԱՄՆ-ն նրան մեզ չհանձնի, ապա դա կազդի մեր հարաբերությունների վրա: Մենք չենք ցանկանում, որ բանը հասնի դրան»:

Նա նաև նշել է, որ ռազմական հեղաշրջման անհաջող փորձից հետո մի շարք թուրք դեսպաններ և դեսպանատան աշխատակիցներ կազատվեն զբաղեցրած պաշտոններից:

Անդրադառնալով Թուրքիայի և Ռուսաստանի Դաշնության (ՌԴ) նախագահների սպասվող հանդիպմաըն՝ Չավուշօղլուն ասել է, որ նախքան Մեծ քսանյակի (G20) ժողովի շրջանակներում հանդիպելը, երկու նախագահները հանդիպում կունենան: Սակայն Թուրքիայի ԱԳՆ-ի ղեկավարը չի մանրամասնել, երբ և որտեղ է այն տեղի ունենալու:

Չավուշօղլուն տեղեկացրել է, որ G20-ի ժողովի ժամանակ քննարկվելու են նաև ռուս-թուրքական հարաբերությունները և դրանցում սահմանված պատժամիջոցները: Խոսվելու է նաև ռուսական ինքնաթիռի խոցման հետ կապված մի շարք հարցերի մասին:

Արտգործնախարարը վերջում կոշտ կերպով արձագանքել է Եվրահանձնաժողովի նախագահ Ժան Կլոդ Յունկերի այն հայտարարությանը, թե «Եթե Թուրքիան մահապատիժը վերականգնի, կդադարեցնենք ԵՄ անդամության բանակցությունները»: Չավուշօղլուն նկատել է տվել, որ ԵՄ-ն Թուրքիայի վերադասը չէ, որ նման կերպ խոսի իրենց երկրի հետ:

Աղբյուր` Ermenihaber.am