Չավուշօղլու. Ինջիրլիքի ռազմաբազան կարող ենք բացել նաև Ռուսաստանի համար

Տարածաշրջան08:59, 04 Հուլիս 2016

Չավուշօղլու. Ինջիրլիքի ռազմաբազան կարող ենք բացել նաև Ռուսաստանի համար

Թուրքիայի արտգործնախարար Մևլութ Չավուշօղլուն մանրամասներ է հայտնել ռուս գործընկերոջ` Սերգեյ Լավրովի հետ Սոչիում ունեցած հանդիպումից:

Ըստ թուրքական «Haberler.com» լրատվական կայքի` պետական «TRT» հեռուստաընկերությանը հյուրընկալված Չավուշօղլուն հայտարարել է, որ հանդիպումը ծայրաստիճան օգտակար է եղել երկկողմ հարաբերությունների և հատկապես տնտեսական ու տարածաշրջանային խնդիրների տեսանկյունից:

Չավուշօղլուն հայտարարել է, որ Լավրովի հետ միասին երկու երկրների միջև բարձր մակարդակի ռազմավարական համագործակցության հանձնաժողովի աշխատանքների մեխանիզմներ են մշակելու` հավելելով որ այդ նպատակով ռուս պաշտոնակցին հրավիրել է Անթալիա:

Թուրքիայի գլխավոր դիվանագետը խոսել է նաև Ռուսաստանի հետ «Իսլամական պետություն» (ԻՊ) ահաբեկչական կազմակերպության դեմ պայքարում համագործակցելու վերաբերյալ` նշելով որ դրա շրջանակներում Ռուսական ինքնաթիռների համար կարող է բացվել Ադանա քաղաքի մոտակայքում գտնվող Ինջիրլիք ռազմաբազան:

«ԻՊ-ի դեմ պայքարում մենք բոլորի հետ համագործակցում ենք: գիտեք, որ Ինջիրլիքի ռազմաբազան տրամադրել ենք ԻՊ-ի դեմ պայքարին ակտիվորեն մասնակցել ցանկացողներին: Ւնչու՞ նմանատիպ համագործակցություն չծավալենք նաև Ռուսաստանի հետ»,- ավելացնելով, որ այդ թեմայով համակարծիք են եղել Լավրովի հետ:

Թուրք նախարարը վերահաստատել է նաև Թուրքիայի և Ռուսաստանի նախագահների մինչև G-20-ի գագաթնաժողովում հանդիպելու պատրաստակամության մասին լուրերը: Ըստ Չավուշօղլուի` այդ հանդիպումը, կախված բանակցություններից, կկայանա հուլիսի վերջին կամ օգոստոսի սկզբին:

Աղբյուր` Ermenihaber.am