Milliyet. «ԱՄՆ-ը Սիրիայում ցամաքային գործողություններ կիրականացնի»

Տարածաշրջան09:40, 28 Հոկտեմբեր 2015

Milliyet. «ԱՄՆ-ը Սիրիայում ցամաքային գործողություններ կիրականացնի»

ԱՄՆ նախագահ Բարաք Օբաման շուտով ռազմական պլան է ստորագրելու, որի շրջանակներում «Իսլամական պետություն» կազմակերպության դեմ պայքարի նպատակով նախատեսվում է հատուկ ցամաքային ստորաբաժանումներ տեղակայել Սիրիայում:

Թուրքական «Mİlliyet» թերթի կայքը, հղում անելով ամերիկյան «Washington Post»-ին, նշում է, որ ԱՄՆ-ի ռազմական ստորաբաժանումները Սիրիայում կաշխատեն քրդական «YPG»-ի (Ժողովրդի պաշտպանության ուժեր) հետ:

Աղբյուրը նշում է, որ նոր ռազմական պլան կազմելու պահանջ դրվել էր նախագահ Օբամայի կողմից դեռևս հունիսին: ԱՄՆ-ի պաշտպանության և արտաքին գործերի նախարարները հավանության են արժանացրել բարձրաստիճան մասնագետների ու ռազմական խորհրդատուների կազմած պլանն ու ներկայացրել նախագահ Օբամային: Սպասվում է, որ առաջիկա շաբաթվա մեջ Օբաման կստորագրի այն:

Աղբյուրը նշում է, որ ԱՄՆ-ի ռազմական ստորաբաժանումները լինելու են փոքրաքանակ և Սիրիայի քրդական ուժերից բացի աշխատելու են նաև որոշ արաբական չափավոր զինված խմբավորումների հետ:

Նշվում է նաև, որ ԱՄՆ-ի նախագահին ներկայացված պլանի մեջ տեղ չի գտել Թուրքիայի կողմից առաջարկվող անվտանգության գոտի ստեղծելու հարցը:

Աղբյուր` Ermenihaber.am