ERMENI HABER AJANSI

Ադրբեջանի պետական նավթային ընկերության (SOCAR) Թուրքիայի մասնաճյուղի նախագահ Քենան Յավուզը ներկայացել է կազմակերպության գործունեությունը և իրականացրած նախագծերը: Այս մասին տեղեկացնում է թուրքական իշխանամետ «Sabah» պարբերականը:

Յավուզը նշել է, որ Թուրքիայում 20 մլրդ դոլարի  ներդրումային ծրագրեր են իրականացնում՝ ընդգծելով, որ դրանք տարածաշրջանի ամենախոշոր նախագծերն են: Ըստ նրա ներկայացրած տվյալների՝ Թուրքիան 2001 թվականից սկսած «BOTAŞ» ընկերության միջոցով Ադրբեջանից 38 մլրդ խմ գազ է գնել:

«Նշված ծավալի գազի դիմաց Ադրբեջանի ստացած գումարը 10 մլրդ դոլարից քիչ է եղել: Ուստի պնդումները, թե Թուրքիան 10 միլիարդ դոլարի կորուստ է ունեցել, հակասում է մաթեմատիկայի կանոններին»,- ասել է SOCAR-ի Թուրքիայի ներկայացուցիչը:

Յավուզը, անդրադառնալով Թուրքիայի և Ադրբեջանի միջև գազի առքուվաճառքի պայմաններին՝ ասել է, որ 2001 թվականին կնքված պայամանգրի համաձայն՝ BOTAŞ-ը միշտ ամենաէժան գազը Ադրբեջանից է գնել և դրանում կարելի է համոզվել այլ երկրների վճարած գումարների հետ համեմատելով:

Տեղեկացնենք, որ Թուրքիայի գլխավոր ընդդիմադիր «Ժողովրդահանրապետական» կուսակցության պատգամավոր Այքութ Էրդողդուն ներկայացրել էր Թուրքիային վնաս բերած պայմանագրերի ցանկը: Այդ ցանկում ընդդիմադիր պատգամավորը ներառել է նաև 2001 թվականին Ադրբեջանի հետ կնքված պայմանագիրը: Ըստ Էրդողդուի՝ պայմանագրի պայմանները փոխվել էին Թուրքիայի շահերին հակառակ, որի պատճառով  Թուրքիան ստիպված է եղել  1.4 մլրդ դոլար վճարել 1.5 տարվա ընթացքում առաջացած գնային տարբերության համար: Էրդողդուի պնդմամբ՝ քանի որ պայմանագիրը կնքվել է 20 տարի ժամկետով, Թուրքիան 10 միլիարդ դոլարի չափ վնաս է կրել: