ERMENI HABER AJANSI

Թուրքիայի պատմագիտական ընկերության նախագահ պրոֆեսոր Ռեֆիք Թուրանը ողջունել է «Փերինչեքն ընդդեմ Շվեյցարիայի» գործով Մարդու իրավունքների եվրոպական դատարանի կայացրած վճիռը և բարձր գնահատել Փերինչեքի դերակատարումն այդ հարցում:

Մամուլի համար արած հայտարարության մեջ Թուրանը մեծապես կարևորել է Եվրադատարանի այդօրինակ վճիռը՝ դա համարելով խիստ դրական թե Թուրքիայի Հանրապետության և թե թուրք ժողովրդի համար: Թուրք պատմաբանը նշել է, թե հայկական հարցը պատմական, քաղաքական ու քարոզչական ասպեկտներ ունի, որոնք շատ են օգտագործվում հայկական սփյուռքի կողմից:

Թուրանն ափսոսանք է հայտնել, որ թեև Եվրադատարանի կայացրած որոշումը էական էր, բայց խնդիրը դեռ լիովին չի լուծվել: Ըստ նրա՝ իրենց հաջորդ սերունդները դեռ պիտի զբաղված լինեն Հայկական հարցի քաղաքական ու քարոզչական բաղադրիչների դեմ կռիվ տալով:

Հիշեցնենք, որ ՄԻԵԴ-ը հոկտեմբերի 15-ին որոշում էր ընդունել, համաձայն որի Շվեյցարիան խախտել է Թուրքիայի «Աշխատավորական» կուսակցության նախագահ Դողու Փերինչեքի ազատ խոսքի իրավունքը: «Փերինչեքն ընդդեմ Շվեյցարիայի» գործում Հայաստանը ներգրավված է որպես երրորդ կողմ: ՀՀ գլխավոր դատախազությայն՝ այդ առիթով արած հայտարարության մեջ մասնավորապես ասվում էր «Եվրադատարանն իր վճռում արձանագրեց, որ հայերն ունեն իրենց և իրենց նախնիների արժանապատվության նկատմամբ հարգանքի իրավունք, այդ թվում՝ այն շրջանակներում, որն առնչվում է ցեղասպանության հետևանքով վնաս կրած հայկական համայնքի ինքնությանը: Դատարանը նաև դրանով արձանագրեց, որ հայերի այդ համոզմունքները և դրա հետ կապված՝ նրանց արժանապատվությունը ենթակա են պաշտպանության կոնվենցիոն չափանիշների շրջանակներում: