ԱՄՆ-ում սկսվել է Հայոց ցեղասպանությանը մասին թուրք ռեժիսորի «Սպի» ֆիլմի ցուցադրությունը

Մշակութային09:08, 22 Սեպտեմբեր 2015

ԱՄՆ-ում սկսվել է Հայոց ցեղասպանությանը մասին թուրք ռեժիսորի «Սպի» ֆիլմի ցուցադրությունը

ԱՄՆ-ում անցյալ շաբաթվանից մեկնարկել է գերմանաբնակ հայտնի թուրք ռեժիսոր Ֆաթիհ Աքընի` Հայոց ցեղասպանության մասին պատմող «Սպի» ֆիլմի ցուցադրությունը:

Ըստ ստամբուլյան հայկական «Ակօս» թերթի` ֆիլմի ցուցադրություններն ընթանում են Լոս Անջելեսում և Նյու Յորքում: Ֆիլմին արդեն անդրադարձել են «Los Angeles Times» և «New York Times» հեղինակավոր պարբերականները:

«Los Angeles Times» թերթում հրապարակված հոդվածում համեմատություն է անցկացվել ֆիլմի գլխավոր հերոս Նազարեթի ու սիրիացի փախստականների դեգերումների միջև` նշվելով, որ Նազարեթի դեգերումների նկարագրությունները կարելի է դիտել որպես տնից ու հայրենիքից զրկված միլիոնավոր սիրիացի փախստականների ողջ մնալու պայքարի ալեգորիկ նկարագրություն:

New York Times-ն էլ ֆիլմում Նազարեթի համրությունը համեմատել է Թուրքիայի երկար ժամանակ շարունակվող լռության հետ:

Հիշեցնենք, որ «Սպի»-ն պատմում է տեղահանված մի հայի` մարդինցի դարբին Նազարեթ Մանուկյանի դեգերումների մասին: Հայոց ցեղասպանության տարիներին նա կորցնում է իր երկվորյակ դստրերին: Տարիներ անց, իմանալով, որ նրանք կարող է ողջ լինեն, ճանապարհվում է նրանց փնտրելու: Ֆիլմի սցենարը հեղինակել են ռեժիսոր Ֆաթիհ Աքընը ու իրանահայ Մարտիկ Մարտինը: Գլխավոր հերոսի դերակատարը ալժիրցի դերասան Թահար Ռահիմն է: Ֆիլմում նկարահանվել են նաևՍիմոն Աբգարյանը, Արսինե Խանջյանը և այլք: 138 րոպե տևողությամբ ֆիլմի նկարահանումներն անցկացվել են Հորդանանում, Կանադայում, Գերմանիայում,Կուբայում և Մալթայում: Իտալակա, ֆրանսիական, գերմանական և ռուսական համատեղ արտադրության այս ֆիլմի պրոդյուսերական կազմը համալրում են Ռուբեն Դիշդիշյանը, Կարլ Բաումգարտները, Ռեյնհարդ Բրունինգը, Ֆաբիեն Վոնիերը:

Աղբյուր` Ermenihaber.am