Ջրհեղեղ Թուրքիայում. 4 ամսվա անձրևը 6 ժամում է տեղացել (տեսանյութ)

Տարածաշրջան08:11, 25 Օգոստոս 2015

Ջրհեղեղ Թուրքիայում. 4 ամսվա անձրևը 6 ժամում է տեղացել (տեսանյութ)

Թուրքիայի Արդվին նահանգի Հոպա շրջանում հորդառատ անձրևները ջրհեղեղի և սողանքի պատճառ են դարձել: Թուրքական «Egitimajansi» լրատվական կայքը տեղեկացնում է, որ Թուրքիայի անտառային և ջրային հարցերի նախարար Վեյսել Էրօղլուն աղետի մանրամասներին ծանոթանալու համար այցելել է Հոպա: Նախարարը հայտնել է, որ աղետի հետևանքով մահացել է 8 հոգի, վիրավորվել 17-ը, մեկ երեխա կորել է:

Նախարարը տեղեկացմամբ՝ օդերևութաբանական ծառայությունը նախօրոք տեղյակ է պահել հորդառատ տեղումների մասին, իսկ տեղական ինքնակառավարման մարմինները զգուշացրել էին քաղաքացիներին:

«6 ժամում տեղումների քանակը կազմել է 250 մմ: Ամբողջ Թուրքիայում տեղումների քանակը տարեկան կազմում է 640 մմ, իսկ այստեղ 4 ամսվա անձրևը 6 ժամում է տեղացել»,- ասել է նախարարը:

Վերջինս հայտնել է, որ դեպքերին անձամբ հետևում է Թուրքիայի վարչապետ Ահմեթ Դավութօղլուն, իսկ կառավարությունը 10 միլիոն լիրա է հատկացրել: