Թուրքիայի դպրոցներում այլևս չի կիրառվելու «ազգության կոդ» կոչվածը

Գիտակրթական08:45, 03 Հուլիս 2015

Թուրքիայի դպրոցներում այլևս չի կիրառվելու «ազգության կոդ» կոչվածը

Թուրքիայի Կրթության նախարար Նաբի Ավջըի շրջաբերականով վերջ է դրվել ոչ մահմեդական փոքրամասնությունների դպրոցներում ընդունելության ժամանակ օգտագործվող «ազգության կոդի» կիրառմանը: Այսուհետև դպրոցականների ընդունելության հարցը կորոշեն դպրոցների տնօրենները:

«Ակոս» շաբաթաթերը գրում է, որ խնդրի վերաբերյալ քրդամետ «Ժողովուրդների դեմոկրատական» կուսակցությունը ներկայացնող հայազգի պատգամավոր Գարո Փայլանը հանդիպել էր Կրթության նախարարի հետ: Հանդիպումից հետո նախարարի հանձնարարականով Փայլանը նախարարության աշխատակիցների հետ մասնակցել է հարցի լուծման աշխատանքներին, որի արդյունքում կազմվել է վերոհիշյալ շրջաբերականը:

Ըստ այդ շրջաբերականի՝ ոչ մահմեդականների ընդունելության հայցադիմումները կուղարկվեն դպրոց, տնօրենն էլ ինքը կորոշի ընդունում է աշակերտին, թե՝ ոչ, և դրա համար «ազգության կոդի» ստուգում չի իրականացվի:

Իսկ երկրորդ որոշմամբ փոխվել է թուրքերենի և հասարակագիտության ուսուցիչների նշանակաման կարգը: Այդ ուսուցիչները նախկինում Կրթության նախարարության կողմից էին նշանակվում, նրանցից մեկին վստահվում էր նաև փոխտնօրենի պաշտոնը: Իսկ այժմ նոր որոշման համաձայն՝ կրթության նահանգային վարչությունները նախօրոք նշանակումների մասին հայտարարություն կտան, որից հետո վերոնշյալ առարկաների ուսուցիչները կդիմեն ոչ մահմեդական դպրոցներին: Համաձայն ուսուցիչների դիմումների՝ տնօրենները կկազմեն մասնագետների ցանկ և կներկայացնեն վերադաս մարմնին՝ նահանգային կրթության վարչություններ: Վերջիններն կիրականացնեն համապաատսխան նշանակումները:

Նշենք, որ 1923-ից ի վեր Լոզանի պայմանագրով ճանաչված Թուրքիայի ազգային փոքրամասնությունների ներկայացուցիչների նկատմամբ գաղտնի կոդ է կիրառվել: Այսպես` համար 1-ը հույների կոդն է, 2-ը` հայերինը, 3-ը` հրեաներինը:

Ազգության կոդի մասին հայտնի էր դարձել 2013 թվականին, երբ ծագումով հայ մի կին, որը վերադարձել էր իր արմատներին` ընդունելով քրիստոնեություն և մկրտվելով հայ եկեղեցում, որոշել էր իր որդուն ուղարկել հայկական դպրոց:

Հայկական դպրոցի տնօրինությունը երեխային դպրոց ընդունելու համար նրանից պահանջել էր գրություն բերել Ստամբուլի կրթության վարչությունից, որտեղ պետք էր պաշտոնապես նշված լինի, որ այդ երեխային հայկական դպրոց ընդունելու որևէ խոչընդոտ չկա: Վարչությունը հայկական դպրոց գնալու թույլտվություն տալիս էր միայն այն դեպքում, եթե նրա «ազգության կոդը» 2 է։

Աղբյուր` Ermenihaber.am

Այս ենթաբաժնի վերջին նորությունները

11:29, 15 սեպ

Թուրքիայի հայկական դպրոցներում աշակերտների թիվը նվազում է

Թուրքիայի հայկական դպրոցներն ու վարժարանները գործում են բացառապես Ստամբուլ քաղաքում։

11:10, 05 սեպ

Թուրքիան ու Վրաստանը կնքել են համագործակցության հուշագիր

Հուշագրի հիմնական նպատակն է իրականացնել համատեղ ծրագրեր՝ երիտասարդության ոլորտում գործընկերության ամրապնդման ուղղությամբ։

12:45, 30 մայ

Բերքլիի համալսարանում ադրբեջանցիների ճնշմամբ կրկին չեղարկվել է Արցախի մասին ֆիլմի ցուցադրությունը

Նշենք, որ ֆիլմի ռեժիսորը Սարին Հայրապետյանն է և ֆիլմը պատմում է 11 տարեկան տղայի մասին, ով տեղահանվել էր Արցախից Հայաստանի և Ադրբեջանի միջև 44-օրյա պատերազմի ժամանակ։