Թուրքիան Եվրոպայի 7-րդ ամենաթանկ երկիրն է

Տնտեսական07:45, 23 Հունիս 2015

Թուրքիան Եվրոպայի 7-րդ ամենաթանկ երկիրն է

Թուրքիայի հետազոտական ընկերության՝ բնակչության գնողունակության վերաբերյալ հրապարակած վիճակագրության համաձայն՝ ապրանքների և ծառայությունների մատչելիության առումոով եվրոպական 37 երկրների ցուցակում Թուրքիան 10-րդ տեղն է գրավում:

Ըստ թուրքական «ensonhaber.com» լրատվակայքի ՝ այդ 37 երկրներում (Եվրամիության անդամ 28 երկրները, «Ազատ առևտրի եվրոպական ասոցիացիայի» (EFTA) 3 երկրները՝ Շվեյցարիան, Իսլանդիան, Նորվեգիան, ԵՄ-ի 5 թեկնածու երկրներն ու Բոսնիա- Հերցոգովինան) ամենաթանկ երկիրը Շվեդիան է, իսկ ամենաէժան ապրանքներ և ծառայություններ վաճառող երկիրը՝ Մակեդոնիան: Այսպես, միջինում 100 եվրո արժողությամբ ապրանքներն ու ծառայությունները Շվեդիայում կարելի է ձեռք բերել 154 եվրոյի, իսկ Մակեդոնիայում՝ 47 եվրոյի դիմաց:

2014 թ. Թուրքիայի համար այդ ցուցանիշը հավասար է եղել 61 եվրոյի, մինչդեռ նախորդ՝ 2013թ. այն կազմում էր 64 եվրո: Ըստ աղբյուրի՝ պատճառը եվրոյի փոխարժեքի տատանումն է Թուրքիայում: 2013թ. 1 եվրոն համարժեք է եղել 2.53 թուրքական լիրայի, իսկ 2014թ.՝ 2.91 լիրայի:

Թուրքիայի վիճակագրական ընկերության նույն հետազոտության արդյունքների համաձայն՝ Թուրքիայում ամենաթանկ ապրանքները անձնական փոխադրամիջոցներն են, որոնք դուրս են միջինացված 100 միավորի սահմաններից: Այս առումով Թուրքիան Եվրոպայի 7-րդ ամենաթանկ երկիրն է՝ Նորվեգիայից, Դանիայից, Իսլանդիայից, Ֆինլանդիայից, Հոլանդիայից և Պորտուգալիայից հետո: Մնացած ապրանքների և ծառայությունների գները ավելի ցածր են եվրոպական նշյալ չափանիշային միավորից: Այսպես, սպառողական էլեկտրոնիկայի և ալկոհոլային խմիչքների միջինացված ինդեքսը հավասար է 87 միավորի, սննդի և ոչ ալկոհոլային խմիչքներինը՝ 84 միավորի, ռեստորանների և հյուրանոցներինը՝ 74, հագուստինը՝ 63, սպառողական ապրանքների և ծառայություններինը՝ 61 միավորի:

Աղբյուր` Ermenihaber.am