Մահչուփյան. «Մարդիկ զգացել են, որ ԱԶԿ-ն ուղղակի օգտագործում է կրոնի գործոնը»

Հասարակական13:51, 22 Հունիս 2015

Մահչուփյան. «Մարդիկ զգացել են, որ ԱԶԿ-ն ուղղակի օգտագործում է կրոնի գործոնը»

Թուրքիայի վարչապետ Ահմեթ Դավութօղլուի նախկին գլխավոր խորհրդական Էթյեն Մահչուփյանը «El Cezire»-ին տված հարցազրույցում խոսել է իշխանական «Արդարություն և զարգացում» (ԱԶԿ-AKP) կուսակցության սոցիալ-քաղաքական կորուստների մասին:

Լրագրողը Մահչուփյանին խնդրել է պարզաբանել վերջինիս հոդվածում գրված «ԱԶԿ-ն մնաց Թուրքիայի սոցիոլոգիայի հետևում» արտահայտությունը:

Մահչուփյանը, հիշեցնելով, որ ԱԶԿ-ն առաջին անգամ իշխանության է եկել՝ ստանալով 34 տոկոս ձայն, նշել է, որ կուսակցությանը հաջողվել է իշխանության գալուց հետո ընդլայնել աջակիցների թիվը: ԱԶԿ-ի օրոք տնտեսական թռիչք է եղել, սոցիալական հաջողություններ են արձանագրվել մոբիլիզացիայի, աշխարհին ինտեգրվելու հարցերում: Սակայն կա մի կրթված քաղաքաբնակ ու երիտասարդ հատված, որն ավելի բարձր մակարդակ է ուզում:

Մահչուփյանի կարծիքով դրա պատճառն էլ այն է, որ նորմերը փոխվել են, և մարդիկ կարողանում են համեմատություն անել, քանի որ նրանք ավելի շատ են ճանապարհորրդում ու կարողանում տեղեկանալ, թե աշխարհի որ մասում ինչ է կատարվում:

«Հարկավոր է միանգամից բազմաթիվ տարբեր շերտեր ընդգրկող քաղաքականություն: ԱԶԿ-ն դա չկարողացավ հասկանալ: Իր առջև կանգնած խնդիրներին իր ռեֆլեքսներով պատասխանեց` մտածելով, որ բոլորը կհետևեն այդ ռեֆլեքսին»,- նկատել է Մահչուփյանը:

Դավութօղլուի նախկին խորհրդականի հաշվարկներով ԱԶԿ-ն, նույնիսկ քրդական ձայները մի կողմ դրած, 46-47 տոկոս քվե ստանալու պոտենցիալ ուներ:

Մահչուփյանն, անդրադառնալով ԱԶԿ-ի քաղաքականության մեջ օգտագործվող իսլամական տարրերին, նշել է, որ ամեն բան հակառակ էֆեկտ է ունենում, երբ անցնում է նախընտրելի չափերը: Ըստ Մահչուփյանի` այս ընտրություններին իսլամական հատվածի մի մասը կուսակցությունը ձայն չտվեց ոչ թե այն պատճառով, որ պակաս հավատացյալ է դարձել, այլ զգացել է, որ ԱԶԿ-ն ուղղակի օգտագործում է կրոնի գործոնը և այս ուղղությամբ անցնում սահմանները:

Աղբյուր` Ermenihaber.am