Ստամբուլ. հետընտրական տրամադրություններ

Հասարակական07:50, 09 Հունիս 2015

Ստամբուլ. հետընտրական տրամադրություններ

Հունիսի 7-ին Թուրքիայում տեղի ունեցած խորհրդարանական ընտրություններից հետո Ստամբուլում տիրում է տոնական տրամադրություն: Տոնի պատճառն այն է, որ իշխող «Արդարություն և զարգացում» կուսակցությունը (ԱԶԿ-AKP), ով Ստամբուլում համեմատաբար քիչ աջակիցներ ունի, նախատեսվածից քիչ ձայներ է ստացել:

Ի դեպ, «քիչ» ասվածը իրենից ներկայացնում է 40%: Այլ երկրի դեպքում գուցե այս «քիչը» տարօրինակ թվա, բայց Թուքրիայի դեպքում սա իսկապես քիչ է, քանի որ ԱԶԿ-ն տարիներ շարունակ միանձնյա է ստանձնել երկրի կառավարման ղեկը: Կոալիցիայի մասին խոսք անգամ չի եղել: Տոնի մեկ այլ պատրվակ է նաև ազգային փոքրամասնությունների ֆավորիտ քրդամետ «Ժողովուրդների դեմոկրատական կուսակցության» (ԺԴԿ-HDP)՝ 10 տոկոսանոց շեմի հաղթահարումը:

Եթե թվերով խոսենք, ապա Թուրքիայի նոր խորհրդարանում ԱԶԿ-ն (AKP) կունենա 258 պատգամավոր, ԺՀԿ-ն (CHP)` 130, ԱՇԿ-ն (MHP)` 80, իսկ ԺԴԿ-ն (HDP)` 80 պատգամավոր:

Ստամբուլում, որտեղ ԱԶԿ-ն ամենաշատ ձայներն է կորցրել, հասարակության մեջ տիրող տրամադրություններից կարելի է ասել, որ ընտրությունների արդյունքներից գրեթե բոլորը գոհ են: Ի դեպ, ընտրության արդյունքներից գոհ ընտրողների մեջ հիմնականում հանդիպում է երկու տեսակի արձագանք:
Նրանց մի խումբը տոնում Էրդողանի իշխանության թուլացումը, իսկ մյուս խումբը ԺՀԿ-ի հաղթանակը: Ընտրողների մի ստվար զանգված քվեարկել է ԺՀԿ-ի օգտին զուտ ԱԶԿ-ին վնաս հասցնելու համար:

էրդողանի կուսակցության պարտությունը լայնորեն քննարկվում է նաև սոցցանցերում: Թուրք օգտատերերն անում են այսպիսի գրառումներ`
«ԱԶԿ-ի վերջն եկավ»,
«Ազատվեցինք ԱԶԿ-ի լծից»,
«Պարտվեց ոչ թե ԱԶԿ-ն, այլ չարությունը, օտարացումը, նվաստացումը, անարդարությունը, վախն ու ճնշումը» :

Տարածվում են նաև մեծ թվով ծաղրանկարներ, որոնցից է օրինակ ներքոբերյալը`

Հետաքրքիր է նաև ընտրությունների արդյունքները հայտարարելուց հետո թուրքական առաջատար թերթերի շապիկների բովանդակությունը:

Այսպես օրինակ՝

Hurriyet` «Շեմը քանդվեց»
HaberTurk` «Նոր ժամանակշրջան բոլորի համար, շեմը քանդվեց»
Cumhuriyet` «Ահա քեզ նոր Թուրքիա»
Zaman՝ «Ազգն ասաց` բավական է»
Sabah՝ «Քվեատուփ՝ առանց իշխանության»
Taraf ՝ «Էրդողանի պալատը փլվեց»

Ընդհանուր առմամբ կարելի է ասել, վերջին 13 տարվա մեջ այս ընտրությունները, դրանց արդյունքները և հետընտրական մթնոլորտն արմատականորեն տարբերվում են նախորդներից.

Հեղինակ` Աստղիկ Իգիթյան / Ստամբուլ

Աղբյուր` Ermenihaber.am