Թուրքիայում սահմանադրական փոփոխությունները՝ ծաղրանկարի տեսքով

Հասարակական12:34, 26 Մայիս 2015

Թուրքիայում սահմանադրական փոփոխությունները՝ ծաղրանկարի տեսքով

Թուրքիայի նախագահ Ռեջեփ Թայիփ Էրդողանը նպատակ ունի կյանքի կոչել սահմանադրական փոփոխությունները Թուրքիայում, եթե հունիսի 7-ին կայանալիք ընտրությունների արդյունքում «Արդարություն և զարգացում» կուսակցությունը (ԱԶԿ-AKP) խորհրդարանում կարողանա կազմել մեծամասնություն:

Մասնավորապես, խոսքը գնում է Թուրքիայում նախագահական համակարգի ներդրման մասին, որը , թուրքական «baskanliksistemi.com» կայքի բնութագրմամբ, ենթադրում է պետության և կառավարության մեկ ընդհանուր նախագահ: Այլ կերպ ասած՝ կառավարման այս համակարգում երկրի նախագահը միաժամանակ նաև խորհրդարանի նախագահն է: Նա ընտրվում է ուղղակիորեն ժողովրդի կողմից: Նախագահը լիազորված է կառավարության անդամներին նշանակելու և ազատելու իրավունքով: Միաժամանակ նա պարտավոր չէ հաշվի նստել կառավարության անդամների կարծիքների հետ և ընդհանրապես, իր գործունեության համար որևէ մեկին պատասխանատու չէ:

Այսպիսով,նախագահական համակարգը, որոշակի իմաստով, գրեթե անսահմանափակ իշխանություն կարող է տալ Էրդողանին, եթե նրան հաջողվի իրականացնել իր նախատեսած սահմանադրական փոփոխությունները:

Թուրքիայի թե քաղաքական շրջանակներում, թե հասարակության շրջանում Էրդողանի այս նախաձեռնությունը քննադատությունների և բողոքի պատճառ է հանդիսացել: Այն առիթ է դարձել մի շարք քննադատական արձագանքների, որոց շարքում հատկապես ուշագրավ է վերջերս թուրքական սոցցանցերում լայն տարածում գտած մի ծաղրանկար:

Ծաղրանկարում Էրդողանի նկարի հետ միասին ներկայացված է հետաքրքիր մի բառախաղ ՝ «bANAYASAl, sANAYASAk», որի հիմքում թուրքերեն «սահմանադրություն» բառն է ՝ «anayasa», իսկ բառի սկզբում և վերջում Էրդողանի կողմից ավելացված տառերի օգնությամբ հետաքրքիր բառախաղ է ստացում, որի իմաստը թարգմանաբար նշանակում է . «Ինձ համար թույլատրելի (օրինական) սահմանադրություն, քեզ համար՝ արգելված»:

Ծաղրանկարն առավելապես տարածված է Twitter, Facebook և İnstagram- ում և ուղեկցվում է «ԱԶԿ-ի՝ ժողովրդավարության ըմբռնումը», «Մեր երկրի ժողովրդավարությունը» և նմանատիպ մեկնաբանություններով:

Աղբյուր` Ermenihaber.am