ERMENI HABER AJANSI

Թուրքիայի վարչապետ Ահմեթ Դավութօղլուի` Աֆյոնքարահիսար քաղաքում այսօր տեղի ունենալիք հանրահավաքից առաջ, «Գորշ գայլեր»-ի քաղաքական թևը համարվող «Ազգայնական շարժում» կուսակցության (ԱՇԿ - MHP) քաղաքային գրասենյակի պատին մեծադիր պաստառ է փակցվել` հետևյալ գրությամբ. «Հեյ Դավութօղլու, ու՞ր էիր այն ժամանակ, երբ հույները զավթում էին Աֆյոնքարահիսարը»: Գրության հետ միասին պատկերված է նաև Թուրքիայի վարչապետի ծաղրանկարը:

Ըստ թուրքական «sozcu.com.tr» լրատվական կայքի` MHP-ի տարածքային գրասենյակը, որի վրա կախվել է մոտ 40քմ մակերեսով պաստառը, 50մ հեռավորության վրա է գտնվում այն հրապարակից, որտեղ պետք է տեղի ունենա Դավութօղլուի հանրահավաքը: Ազգայնականների այս հումորային պաստառը պատասխանն է Դավութօղլուի` Քյութահիայի հանրահավաքի ժամանակ ընդդիմադիր MHP-ին և «Ժողովրդահանրապետական» (ԺՀԿ–CHP) կուսակցության ուղղված մեղադրանքին, ըստ որի, նրանք իրականում դեմ չեն եղել ռազմական հեղաշրջումներին:

Դավութօղլուն այդ թեմայով հետևյալ հարցադրումն էր արել. «Ո՞ւր էին MHP-ն և CHP-ն, երբ կախաղան էին հանում Ադնան Մենդերեսին»:

Նշենք, որ ավելի վաղ էլ MHP-ի խորհրդարանական խմբակցության փոխնախագահ Օքթայ Վուրալը, պատասխանելով Դավութօղլուի այս հայտարարությանը, ասել էր. «Այդ ժամանակ MHP կուսակցությունը գոյություն չուներ, այ անգրագետ: Գիտեինք, որ նա տեղյակ չէ, թե վարչապետ է, դեռ կարծում է, որ դպրոցական երեկույթի է մասնակցում: Տեսնես՝ երբ 1960թ. մարդիկ մահապատժի էին ենթարկվում, նա որտե՞ղ էր, մահճակալի տա՞կ էր թաքնված: Երբ մենք սեպտեմբերի 12-ին տանջանքների էինք ենթարկվում, Դավութօղլուն ի՞նչ էր անում, քեբա՞բ էր ուտում»: