ERMENI HABER AJANSI

Թուրքիայում որոշ ժամանակ առաջ մեծ իրարանցում առաջացրած Twitter-ի «Fuat Avni» ծածկանունով բաժանորդը նոր ուշագրավ հայտարարություններով կրկին քննարկումների մեծ ալիք է առաջացրել:

Թուրքական «sozcu.com.tr» լրատվակայքի վկայությամբ՝  սկանդալային այս բաժանորդը մեկնաբանություններ է արել Թուրքիայի վարչապետ Ահմեթ Դավութօղլուի  և  փոխվարչապետներ Նուման Քուրթուլմուշի, Ալի Բաբաջանի ու Բյուլենթ Արինչի հանդեպ դրևսորած նախագահ Ռեջեփ Թայիփ Էրդողանի վերաբերմունքի մասին: Իր գրառումներով Ֆուաթ Ավնին տեղեկացրել է, թե ինչու է վերջիններիս նկատմամբ Էրդողանը կորցրել վստահությունը: Որպես պատճառներ նշվում են Քուրթուլմուշի՝ նախկինում գյուլենական համայնքի դպրոցներում աշխատելը, Բաբաջանի տնտեսական թեմաներով հայտարարությունները և Արընչի անվերջ քննադատություններ:

Բաբաջանին և Քուրթուլմուշին Ֆուաթ Ավնին համարում է գյուլենական համայնքի (զուգահեռ կառույցի) անդամ, իսկ  Արընչի մասին գրում է. «Նա ցնդած է, որտեղ բարձրախոս է տեսնում, հիմարություններ է ասում, մեզ կկործանի: Դրան պետք է էկրաններից հեռու պահել»:

Իսկ Դավութօղլուից Էրդողանի դժգոհությունը, ըստ Ֆութա Ավնիի, պայմանավորված է Էրդողանի մասին Դավութօղլուի արած այն հայտարարությամբ, թե «Կգնա Գերմանիա, ամեն ինչ իրար կխառնի, իսկ ես պիտի իրենից հետո ամեն ինչ կարգավորեմ»:

Twitter-ի վերոհիշյալ  գրառումներում նշվել է նաև, որ «Էրդողանն իր ընդունած որոշումների մասին կառավարությանը տեղյակ չի պահում: Դատավորների ձերբակալության մասին Դավութօղլուն բոլորի նման հետո է միայն տեղեկացել»: