Թուրքական իշխանամետ թերթ. «Թուրքիան քաոսի նախաշեմին է»

Տարածաշրջան08:20, 06 Ապրիլ 2015

Թուրքական իշխանամետ թերթ. «Թուրքիան քաոսի նախաշեմին է»

Թուրքիան կանգնած է ներքին պառակտությունների և քաոսի վտանգի առաջ: Այս մասին ահազանգում է թուրքական իշխանամետ «Յենի Աքիթ» պարբերականը՝ «Երկրորդ Գեզի նախաձեռնություն. եթե այս ծրագիրը գործի, Թուրքիան մաս-մաս կլինի» վերնագրով հոդվածում:

Անդրադառնալով վերջին օրերին Թուրքիայում իրար հաջորդող տագնապալի իրադարձություններին՝ հոդվածագիրը դրանք բնորոշում է որպես «Երկրորդ Գեզիի փորձերը»:

Միջանկյալ նշենք, որ խոսքը 2013-ի հունիսին Ստամբուլի Գեզի զբոսայգու տարածքում նախատեսված անօրինական կառուցապատման դեմ որպես բողոքի ակցիա սկսված և Թուրքիայում մեծ իրարանցման ու զոհերի պատճառ դարձած հակակառավարական ցույցերի մասին է, որոնք հայտնի են «Գեզիի դեպքեր» անունով):

«Սադրիչ գործողություններ կարող են լինել: Ուշադրություն, խնդրում եմ»,- ահազանգում է թերթը:

Հեղինակը հիշեցնում է օրեր առաջ Թուրքիայի համատարած հոսանքազրկման, այնուհետև «Balyoz» գործով մեղադրյալների իրավունքների վերականգնման դեպքերը («Balyoz» անվամբ հայտնի է այն ենթադրյալ ռազմական գործողությունը, որը 2003թ. իբրև թե թուրքական կառավարության հեղաշրջման նախագիծ էր նախապատրաստել: Այս գործի շրջանակներում ժամանակին 365 հոգի էր մեղադրվել և նրանցից 325-ը ցմահ բանտարկության էր դատապարվել, սակայն ավելի ուշ պատիժները անհամեմատ ավելի մեղմացվել էին):

Հիշեցնելով նաև ստամբուլյան արդարադատության շենքում պատանդ վերցված այնուհետև հրազենային վնասվածք ստացած դատախազ Մեհմեթ Սելիմ Քիրազի մահը՝ հոդվածագիրը պնդում է, որ այս ամենը բոլորովին պատահական չեն:

«Մի բան միանշանակ է: Թուրքիան մուտք է գործում ճգնաժամային ընտրական ժամանակաշրջան: Այս ընտրությունները կարևոր են ոչ միայն Թուրքիայի տեսանկյունից, այլև մեր ողջ տարածաշրջանի համար, որը խեղդվում է հետզհետե փտախտի վերածվող խնդիրների մեջ»:

Ալևիական կառույց համարվող «Հեղափոխական ժողովրդական ազատագրական կուսակցություն-ճակատի» ներկայիս ակտիվացումն ու գործունեություն ծավալելը ևս, ըստ հեղինակի, պատահականություն չէ: Եթե Թուրքիայում, որը դեռ չի կարողացել լուծում տալ քրդական հարցին, հիմա էլ ալևիական հարցը բարձրացվի, Թուրքիան կկորցնի մինչ այժմ ձեռք բերած իր բոլոր հաջողությունները և առնվազն 50 տարով հետ կշպրտվի:

«Հատկապես Գերմանիայի, Ֆրանսիայի, Անգլիայի կողմից արհեստականորեն ալևիների հարցը բարձրացնելու նպատակով է հիմա առաջ մղվում «Հեղափոխական ժողովրդական ազատագրական կուսակցություն-ճակատը»: Եթե ալևիների հարցը բարձրացվի, Թուրքիան միանշանակ կքայքայվի, մաս- մաս կլինի»:

Ընդգծելով, որ Անկարայի համար բացասական ուժերը ոչ մի բանի առաջ կանգ չեն առնի Թուրքիայում քաոս առաջացնելու համար, հոդվածագիրը կոչ է անում թուրքական լրատվամիջոցներին, երկրի համար ծանր և նախաճգնաժամային այս իրավիճակում զերծ մնալ հրահրիչ, լարվածություն առաջացնող և երկրում քաոս ստեղծելուն նպաստող հրապարակումներից:

Աղբյուր` Ermenihaber.am

Այս ենթաբաժնի վերջին նորությունները

12:53, 12 սեպ

Ֆիդան․ Կատարի դեմ հարձակումը պետք է սթափեցնի Նեթանյահուին հանդուրժողներին

Թուրքիայի արտաքին գործերի նախարարը Հռոմում իտալացի գործընկերոջ հետ կայացած համատեղ մամուլի ասուլիսում անդրադարձել է Իսրայելի կողմից Կատարի վրա ռմբակոծությանը: