ERMENI HABER AJANSI

Ստամբուլի նեղլիկ փողոցներից մեկում գտնվող շենքերից մեկի մուտքին փակցված «ՄԱՐԱԼ» երգի ու պարի համույթ» գրությամբ ազդագիրը հայկական աշխույժ ներկայության մասին է ազդարարում:

Ներսում անսովոր ու հայկական եռուզեռ է տիրում: Ամենուր հայկական տարազներ, աքսեսուարներ, հայերեն զրույցներ ու երաժշտություն: Դերձակները վերջին շտկումներն են ավելացնում հագուստներին, երաժիշտները փորձին են նախապատրաստում դուդուկներն ու զուռնա-դհոլները: Առաջիկա համերգի վերջին փորձերն են արվում: Ծրագիրը ներառում է բացառապես հայկական պարեր. «Քոչարի», «Իշխանաց պար» ու «Ծաղկած բալենի»: «ՄԱՐԱԼ»-ը պատրաստվում է տոնել իր 35-ամյակը:

Ստամբուլի «ՄԱՐԱԼ» երգի ու պարի համույթը հիմնադրվել է 1980թ. Բենոն Կուզաբաշի և ընկերների կողմից: Համույթի գործունեության  հիմնական նպատակն է ներկայացնել հայկական մշակույթը, պարերը, երգ-երաժշտությունը:

1992 թվականից գեղավեստական ղեկավարի պաշտոնն ստանձնել են 1980-ականների մարալցի պարողներ Կարպիս-Իրիս Չափքան ամուսինները:
Խումբն ունի շուրջ 6- 36 տարեկան 140 պարող: Պարողները Ստամբուլի Եսայան հայկական դպրոցի ներկա ու նախկին սաներն են:

«Մեծ հուզմունքով ու ոգևորությամբ ենք սպասում համերգին: Գեղեցիկ ծրագիր ենք պատրաստել ու  հույս ունենք՝ հանդիսատեսին կպարգևենք երջանիկ պահեր» -ասում է Կարպիս Չափքանը:

Այն հարցին, թե ինչպիսին է հետաքրքրությունը համերգի հանդեպ, Կարպիս Չափքանը պատասխանեց, որ համերգը կայանալու է 2.500 հանդիսատեսի համար նախատեսված դահլիճում և ներկայումս տոմսերը գրեթե ամբողջովին վաճառված են:

Համերգը տեղի կունենա դեկտեմբերի 14-ին, «Istanbul Kongre Merkezi» կոչվող համերգասրահում, ժամը՝ 20:00:

Աստղիկ Իգիթյան / Ստամբուլ

Ermenihaber.am