ERMENI HABER AJANSI

Freedom House հեղինակավոր միջազգային իրավապաշտպան կազմակերպությունը հրապարակել է համացանցի ազատության մասին տարեկան զեկույցը: Freedom House-ի ցանկում Թուրքիան համացանցի ազատության տեսանկյունից 55 միավորով հայտնվել է մասամբ ազատ երկրների շարքում:

Թուրքական «Ջիհան» լրատվական գործակալության տեղեկացմամբ՝ ամենամեծ անկում ապրած երկրների ցանկում Թուրքիան առաջին տեղն է գրավում: Նախորդ տարվա համեմատ Թուրքիան կորցրել է 6 միավոր, իսկ վերջին 5 տարիների ընթացքում՝ 13 միավոր: Զեկույցի՝ Թուրքիային վերաբերող հատվածում հիշեցվում է երկրում տեղի ունեցած զանգվածային բողոքի ակցիաների, կոռուպցիոն սկանդալի, ոստիկանության կողմից ցուցարարների նկատմամբ անհամաչափ ուժի կիրառման, իշխող «Արդարություն և զարգացում» կուսակցության համախոհ լրատվամիոցների` երկրում տեղի ունեցող դեպքերի ոչ պատշաճ լուսաբանման մասին: Նշվում է, որ այս ամենին հաջորդել է  այդ ժամանակի վարչապետ Ռեջեփ Թայիփ Էրդողանի հայտարարությունը «Twitter» սոցիալական կայքի մասին, թե իբր վերջինս և դրա նմանները սպառնալիք են ներկայացնում հասարակության համար: Այդ ընթացքում արգելվեց մուտքը  հազարավոր կայքեր, մասնավորապես «Soundcloud»-ը, «Vimeo»-ն, «Youtube»-ը, «Twitter»-ը: 2014 թվականի ապրիլի դրությամբ Թուրքիայում արգելված կայքերի թիվը 11 հազարից հասել էր 40 հազարի:

Զեկույցը քննադատում է ազգային հետախուզական ծառայությանը տրված արտոնություններն ու լիազորությունները: Համապատասխան այդ արտոնությունների՝ երկրի հետախուզությանն իրավասություն  է վերապահվում առանց դատարանի  որոշման հետախուզություն կատարել հասարակական կազմակերպությունների, մասնավոր ընկերությունների և անհատների վերաբերյալ տեղեկություններ ձեռք բերելու համար:

Ermenihaber.am