ERMENI HABER AJANSI

Թուրքիայի վարչապետ Ահմեթ Դավութօղլուի գլխավոր խորհրդական հայազգի Էթյեն Մահչուփյանը թուրքական «Աքշամ» թերթում հրապարակած հոդվածում իր տեսակետներն է արտահայտել  Թուրքիայում 2015 թվականի հունիսին տեղի ունենալիք խորհրդարանական ընտրությունների արդյունքների վերաբերյալ:

Մահչուփյանը նշում է, որ իր ենթադրությունները հիմնված են այս տարվա ՏԻՄ ընտրությունների վրա, սակայն հաշվի են առնված նաև համապետական ընտրությունների առանձնահատկությունները: Հեղինակը նշում է, որ թուրքական ընտրազանգվածի մեջ 2 միլիոնանոց հատված կա, որն իր ձայները ՏԻՄ ընտրությունների ժամանակ տալիս է «Ազգայնական շարժում» կուսակցությանը (ԱՇԿ), իսկ խորհրդարանական ընտրություններին՝ «Արդարություն և զարգացում» կուսակցությանը (ԱԶԿ): Ելնելով այս հանգամանքից՝ Մահչուփյանը ՏԻՄ ընտրություններին ԱԶԿ-ի ստացած 44%-ին համապետականի համար ավելացնում է ևս 4 տոկոս: Մահչուփյանի խոսքերով ազգային փոքրամասնությունների շահերը ներկայացնող «Ժողովուրդների դեմոկրատիա» կուսակցությունն (ԺԴԿ) էլ նախագահական ընտրությունների ժամանակ ստացած 10%-ը չի պահպանի և կրկին կիջնի ավանդական 6 տոկոսի մակարդակին:

Դավութօղլուի գլխավոր խորհրդականն  այսպես է կանխատեսում 2015-ին Թուրքիայում կայանալիք համապետական ընտրությունների արդյունքները՝ ԱԶԿ-48%, ԺՀԿ («Ժողովրդահանրապետական» կուսակցություն),-24%, ԱՇԿ-15%, ԺԴԿ-6%, մնացածներ-7%:

Մահչուփյանն իր կանխատեսումներին հավելում է նաև այն հանգամանքը, որ ըստ ուսումնասիրությունների՝  ԱԶԿ-ի վարած քաղաքականությանն այժմ հավանություն է տալիս բնակչության գրեթե 60%-ը, իսկ ԺՀԿ-ի և ԱՇԿ-ի վարկանիշն այժմ ավելի ցածր է, քան վերջին ընտրությունների ժամանակ: Ի մի բերելով ընդհանուր պատկերը՝ հեղինակը նշում է, որ շատ հավանական է, որ հունիսին ԱԶԿ-ն գերազանցի 50%-ի շեմը: 

Ermenihaber.am