Թուրք նախարարը հայտնել է, որ 2015-ին իրենք Բրյուսելում ցուցադրելու են հայկական մշակույթը

Մշակութային08:13, 26 Նոյեմբեր 2014

Թուրք նախարարը հայտնել է, որ 2015-ին իրենք Բրյուսելում ցուցադրելու են հայկական մշակույթը

Բրյուսելում անցկացվել է մամուլի ասուլիս` նվիրված Եվրոպայում ամենահայտնի արվեստի միջազգային մշակութային փառատոնի (Europalia) թեմային: Ասուլիսին ներկա է գտնվել Թուրքիայի մշակույթի և զբոսաշրջության նախարար Օմեր Չելիքը: Նշյալ փառատոնն անցկացվում է սկսյալ 1969 թվականից:

Ըստ «Թուրքիյե գազեթեսի» լրատվակայքի` թուրք նախարարը հավաստիացրել է, որ 2015-ի ամռանը Բրյուսելում կայանալիք փառատոնին հյուրի կարգավիճակով մասնակցող Թուրքիան եվրոպական արվեստասեր հասարակությանը կծանոթացնի Թուրքիայի մշակութային ժառանգության հետ:

Բելգիացի լրագրողներից մեկը դիմել է Չելիքին` հարցնելով, թե արդյոք իրենք պատրաստվում են ներկայացնել հայ արվեստագետների գործերը: Ի պատասխան թուրք նախարարն ասել է, որ ներակայցնելու են ինչպես թուրքերի, այնպես էլ հայերի, քրդերի, հրեաների և այլ ազգային փոքրամասնությունների կերտած մշակույթը:

«Հայկական մշակույթը օտար չէ մեր մշակույթին: Անատոլիայի մշակույթին ծանոթացնելիս` մենք չենք փորձելու մասնատել այն: Հայը, հույնը թուրքը բոլորը միասին են կերտել Անատոլիայի մշակույթը: Նրանց բոլորին ներկայացնելու ենք որպես մեկ օրգանական միասնություն»:

Ըստ Չելիքի` փառատոնին ցուցադրվելու են վերականգնված եկեղեցիների լուսանկարները, մասնակցելու են թուրքահայ արվեստագետներ, գրականագետներ, գրողներ, կինոգետներ, ճարտարապետներ, որոնք հանրությանը ներակայացնելու են հայկական մշակութային արվեստը: Նախարարը թվարկել է նրանց անունները, որոնց մասնակցությունն արդեն ստույգ ծրագրված է (Թաթյոս Էֆենդի, Նիկողող աղա, Քեմանի Սարգիս Էֆենդի, Բիմեն Շեն, Մարգար Եսայան, Ժակլին Չելիք, Կարին Քարաքաշլը):

Ցուցադրվելու է օսմանյան շրջանի պալատական լուսանկարների ցուցահանդես, որոնց մեծ մասի հեղինակները հայ լուսանկարիչներ են եղել:

Ermenihaber.am