ERMENI HABER AJANSI

Թուրքիայում գործող «Ժողովուրդների դեմոկրատական կուսակցության» համանախագահ, հանրապետության նախագահի նախկին թեկնածու, ծագումով զազա քուրդ քաղաքական գործիչ Սելահաթթին Դեմիրթաշը քուրդ երիտասարդներին կոչ է արել պատերազմել «Իսլամական պետություն» (ԻՊ) ծայրահեղական կազմակերպության ահաբեկիչների դեմ:

Անդրադառնալով Սիրիայի հյուսիս-արևմուտքում քրդական գյուղեր գրաված և  քրդաբնակ Քոբանի բնակավայրը պաշարած իսլամիստ ահաբեկիչների գործողություններին` Դեմիրթաշը դժգոհել է, որ Թուրքիայի իշխանությունները կոշտ հայտարարություններով չեն դատապարտում այդ ամենը: Թեև պաշտոնական Անկարան կտրականապես հերքում է «ԻՊ»-ի հետ գործակցելու մասին լուրերը, բայցևայնպես, ըստ Դեմիրթաշի, կասկածները խորանում են, երբ Թուրքիան փաստորեն չի անդամակցում «ԻՊ»-ի դեմ պայքարող միջազգային կոալիցիային, չի օգնում է ահաբեկիչների դեմ մարտնչող քրդերին:

Դեմիրթաշը խստորեն դատապարտել է վարչապետ Դավութօղլուի հայտարարությունն այն մասին, որ իրենք պատրաստվում են ընդունել և ապաստան տալ Քոբանիից ճարահատյալ տեղահանվող սիրիացի քրդերին: Ըստ քուրդ առաջնորդի` Դավութօղլուի այդօրինակ հայտարարությունը ըստ էության համարձակություն է տալիս իսլամիստներին` շարունակելու իրենց սև գործը: Մինչդեռ պետք էր հենց «ԻՊ»-ին ուղղված սպառնալից հայտարարություն անել:

Դեմիրթաշի դիտարկմամբ` Դավութօղլուի հայտարարությունը կարծես թե հետևյալ ուղերձն է պարունակում. «Իսլամիստները թող հարված հասցնեն, իսկ մենք էլ կընդունենք այս կողմ գաղթող հալածյալներին»:

Ermenihaber.am